21. 8. 2020: Варгольове жытя і смерт. З Меджелабірців до Коросна

Од найблизшой пятниці, 21. серпня/авґуста, в Бюрі Артистичных Выстав в Коросні буде мож видіти творы Енді Варголя. Експозиция буде під назвом «Жытя і смерт Енді Варголя». Представлены експонаты походят зо збіркы Музею Модерного Кумшту Едні Варголя в Меджелабірцях.

Выстава, як поясняют єй орґанізаторы, має оповідати о ріжных періодах жытя артисты. Першый з них то народжыня, пак дозріваня, через час великой світовой славы, аж по смерт.

«Поєдны части выставы были так задуманы візуально і тематично, жебы сотворити почутя єдности і наслідств поєдных світів, котры товаришыли артисті од народин, вчас його жытя, аж до його смерти», зазначают робітникы коросняньского выставового дому. Окрем того, цілю выставы є представити етнос і походжыня Варголя. «Енді Варгол – чловек одникаль, або як хочете – сын русиньскых еміґрантів, походячых зо села Микова, во східній Словациі, вылянсувал в штуці новый спосіб выповіданя артистичной мысли і завдякы тому стал ся суперзвіздом, корольом поп-арту, культовым геройом штукы, як і культурального жытя ХХ ст.», пояснил Мартін Цубяк, директор лабірского Музею.

На коросняньскій выставі представленых буде 91 експонатів. Як бесідувал Михал Быцко, автор концепциі і єден з кураторів коросняньской выставы, нихто не може одмовити Варгольови його американьской приналежности, але так само нихто не можу одмовити му тото, же з походжыня был Русином, же його ґены і выхованя одограли в його жытю велику ролю.

Вернісаж выставы одбуде ся в слідуючу пятницю. На офіцияльну част, котра буде од 18.00 год. до 19.00 год. мают вступ лем особы з запрошынями. Пак выстава буде одкрыта про вшыткых. Вечернє дармове позераня експозициі буде тырвало до 22.00 год. Еспозиция буде до кінця жолтня/октобра. В рамках вернісажу заплянувано тіж проєкцию авторскых фільмів Енді Варголя, котры будут высвітляны на мурах будинку.

Севериян КОСОВСКЫЙ, ЛЕМ-фм, публікуєме в оріґіналї – лемківскім варіантї русиньского языка.