21. 8. 2020: Гелена ҐІЦОВА-МІЦОВЧІНОВА: Стихы

Гелена ҐIЦОВА-МІЦОВЧІНОВА

 

Стихы

 

Своїм дыхом ярь в долинї

одбланила млачкы

і на меджі кучерикы

розпустили крячкы.

 

З фуявіцёв не танцює

вітор тинї-линї,

бо хусточка уж білїє

на каждій тернинї.

 

Скрыла в лузї снїгурочка

чіпкованы влочкы

а свербегуз намалёвав

ружовы квіточкы.

 

І павукы з шовку сітї

на лозины плетуть,

же уж хабза поставила

росцвиту пукету.

 

xxx

 

З веселым криком летять

гостї з чуджіны,

бо уж краснї зеленїють

голузкы лозины.

 

Розплыла ся з долины

стрїброснїжна манна

а з кошаром божых дарів

летить ярна панна.

 

Уж з фарбами красной дугы

сіла коло бранкы

і малює ярны квіткы

на лїсны полянкы.

 

xxx

 

Зрана в бучінї

куковка кукала,

же быстрым ярочком

скленчіна сплавала.

 

Стежку до долины

весна скоротила,

на садок вышнёвый

віночок увила.

 

Розбалює в гаю

з дарами баликы

а пахнючім лугом

летять мотыликы.

 

Бо зеленым шовком

вышывать горбочкы

і на луцї цвинуть

прекрасны квіточкы.

 

(Выбране з Літературного конкурзу Марії Мальцовской, рік 2017.)