21. 7. 2020: Владыка Ніл Лущак став апостольскым адміністратором Мукачовской єпархії

В понедїлёк, 20-го юла 2020-го року, Ватікан выголосив, же Папа римскый Франціск призначів владыку Ніла Лущака, помічного єпіскопа Мукачовской ґрекокатолицькой єпархії, за апостольского адміністратора єпархії ad nutum Sanctae Sedis (до одкликаня Святїшым престолом).

О призначіню інформовав портал Vatican News. Владыка Ніл быв выменованый за адміністратора єпархії по смерти єпархіалного єпіскопа – владыку Мілана Шашіка, котрый нагло вмер з причіны тромбозы 14-го юла 2020-го року. Якраз в день ёго погйробу Святїшый престол вырїшыв о дочаснім повірїню справованя єпархії.

Владыка Ніл Лущак

Ніл Юрій Лущак, ЧМВ (Чін меншых братів францісканів), народив ся 22-го мая 1973-го року в Ужгородї. Теолоґічну і духовну формацію здобыв в Ужгородї і у 1996-ім роцї быв рукоположеный на священика. Слїдуючі рокы робив душпастыря у веце парохіях Мукачовской ґрекокатолицькой єпархії.

В роках 2004 – 2008 штудовав на Папскій Урбановій універзітї в Римі, де здобыв ліценціат із філозофії. У 2009-ім роцї вступив до новіціату Чіну меншых братів францісканів, де дістав монашеске мено Ніл. У 2010-ім роцї зачав учіти філозофію на Ужгородьскій ґрекокатолицькій духовній академії ім. Теодора Ромжы. У 2012-ім склав вічны обіты.

За помічного єпіскопа Мукачовской ґрекокатолицькой єпархії быв выменованый Папом римскым Венедіктом XVI. 19-го новембра 2012-го року. Рукоположеный на єпіскопа быв 12-го януара 2013-го року у Хрестовоздвиженьскім катедралнім соборї в Ужгородї. Головным святителём быв домашнїй єпарха Мілан Шашік, спплусвятителями были метрополіта піттсбурґскый Вільям Шкурла і архієпіскоп Кіріл Василь, котрый быв у тім часї секратерём Конґреґації про восточны церькви.

Петро МЕДВІДЬ, ЛЕМ.фм, жрідло фотоґрафії: Греко-Католицьке Закарпаття, языкова управа: ред. АРК в СР.

 

Script logo