21. 7. 2020: „Ґеніалне про Словакію,‟ оцїнює договор з Бруселу Іґор Матовіч. „В чім Словакія успіла, а што нам може хыбовати?‟

Словакія буде мати в найблизшых роках міліарды на ожывлїня економікы по пандемії. Буде їх мочи черпати з нового фонду обновы і з розрахунку Европской унії в роках 2021 – 2027. На обох ся у вівторок (21. 7. 2020) скоро рано договорили лідры членьскых штатів Европской унії.

Засїданя тырвало пять днї і опроти первістній пропозіції Европской комісії дішло ку многым змінам, но балик встановленый на обнову економік ся не знижыв. Зминило ся але ёго роздїлїня.

Штаты будуть мати к діспозіції 750 міліард евр. Посередництвом ґрантів піде до членьскых штатів 390 міліард евр (намісто планованых 500), далшых 360 міліард будуть мочи штаты черпати у формі пожычок.

Што то значіть про Словакію?

Премєр Іґор Матовіч выслїдок  їднаня по прилечіню з Бруселу означів за ґеніалну справу. Словакія бы мала мати в рамках ґрантів ку діспозіції 7,5 міліарды евр в роках 2021 аж 2023.

Дашых 6,8 міліарды евр собі може пожычати. За пожычкы з фонду обновы буде ручіти Европска унія, подля Матовіча ся вдяка тому урок пожычкы буде ближыти к нулї.

Там але можности черпаня фінанцій із ЕУ не кінчать. На самітї ся їднало і о бюджетї Европской унії на рокы 2021 – 2027, із котрого має Словакія дістати аж 18,6 міліарды евр...

Здрой: Растїслав КАЧМАР, „Denník N“, скорочіня і переклад зо словацького языка: А. З.

Script logo