21. 6. 2020: Б. Ґрелінґ: „Оптімалізація сїтї школ є єднов з нашых пріоріт.‟

Крайскы самосправы мають проґрамы на зефектівнїня сїтї середнїх школ а міністерство школства краям в реалізації тых проґрамів поможе. Выпливать то із заключінь засїданя 18. 6. 2020 у Братїславі Здружіня самосправных країв СК8 із міністром школства, наукы, баданя і шпорту СР Бранїславом Ґрелінґом (третїй справа, першый справа председа Пряшівского высшого теріторіалного цїлку Мілан Маєрьскый).

„Як міністерство были бы сьме барз рады сполупорацовати з краями в єдній лінії, жебы сьме посували школство далей і створёвали якостну уровень навчаня про молодых людей,‟ увів міністер школства, наукы, баданя і шпорту Бранїслав Ґрелінґ.

Краї суть найвекшым зряджователём середнїх школ на Словакії. Густота сїтї тых школ довгодобо не корешпондує з демоґрафічным розвоём. Главно многы одборны школы понукали інтересучім ся о штудії выразно веце вольных місць, як бы быв о тоты школы інтерес. Раціоналізація сїтї школ бы мала принести штату зашпорованя фінанцій.

Фінанції, зашпорованы припадным знижінём кількости школ в сїтї, міністерство школства і самосправны краї хочуть напрямовать назад до школ – як інвестіції. „Є то о тім, жебы сьме знали лїпше заплатити учітелїв, абы сьме знали лїпше выбавити школы, жебы кажда школа мала їдалню, книжніцю і тїлоцвічню, а на то бы мали быти поужыти зашпорованы фінанції,‟ повів міністер школства Б. Ґрелінґ. „Будеме ходити до реґіонів і высвітлёвати на засїданях заступительств і родічам, чом є добрї дакотры середнї школы злучіти,‟ додав міністер на адресу помочі самосправам.

Представителї країв на челї з председом здружіня СР8 Йозефом Віскупічом їднали з міністром школства і о безпечности на школах по траґедії у Врутках. Міністер Б. Ґрелінґ жупанам приобіцяв методіку, зроблену в сполупраці з міністерством внутра і Академіёв Поліцайного збору в Братїславі. „Будеме ся намагати вышколити персонал, як ся мать справовати в тых сітуаціях,‟ додав шеф резорту школства.

Здрой: Портал Міністерства школства, наукы, баданя і шпорту СР, переклад зо словацького языка: А. З.
 

 

 

Script logo