21. 6. 2019: Крайняк діскутовав о навчаню русиньского языка в окресах Снина і Меджілабірцї

В пятніцю, 21-го юна 2019-го року, быв державный секретарь Міністерства школства, наукы, баданя і шпорту Словацькой републікы Петро Крайняк в окресных містах Снина і Меджілабірцї. Крайняк діскутовав о запроваджіню навчаня русиньского языка в спомянутых окресах.

Як інформовала його канцеларія, на проґрамі є і стріча з пріматорами міст Снина і Меджілабірці – Даніелов Ґаландовов і Владиславом Вышньовскым.

 

Запровадити русиньскый язык до школ

Цїлём навщівы двох окресів, в котрых жыє русиньске населїня, было обговорити можности запроваджаня русиньского языка до навчалного процесу на школах, котры в окресах існують і мають словацькый навчалный язык.

В Снинї зачне свій проґрам з директорами школ державный секретарь о 9.00 год. рано. Пополїдне од 13.00 год. з тым самым сценарёв діскутовав Крайняк вже в Меджілабірцях. Резорт школства в остатнім часї змінив леґіслатіву, котра зробила простїшым, жебы навчати меншыновый язык на школах. Якраз то хотїв державный секратарь обговорити з директорами, бо в їх руках є, што на школї в навчалнім процесї є, і што не є.

 

Піднятый норматів без бірокрації і зміны штатуту

Крайняк з тов темов пришов і на остатнє засїданя Округлого стола Русинів Словеньска. Звернув увагу на можность про основны школы з навчалным языком словацькым мати в рамковім навчалнім планї навчаня языка народностной меншыны. Покля о такім моделї школа вырїшыть, школярї той школы будуть мати в 1-ій класї єдну годину языка народностной меншыны, в 2-ій аж 7-ій класі то будуть дві годины і в 8-ій аж 9-ій класі три годины за тыждень. Єдночасно ся про школу підниме норматів на школяря о 4 процента.

То про зряджователїв школ в селах і містах, в котрых жыють члены русиньской народностной меншыны, може быти приятельный крок, котрым бы ся забезпечіло навчаня материньского языка про русиньскых школярїв без того, жебы школа мусила мінити свій штатут, навчалный язык, припадно робити аґенду в двох языках, як то є в припадї школ з навчалным языком народностной меншыны.

Петро МЕДВІДЬ, ЛЕМ.фм, жрідло фотоґрафії: minedu.sk