21. 6. 2016: Рущане ся стрїтнуть уж по 26-ый раз

В днях 1-го аж 3-го юла 2016-го року буде проходити вже 26-ый річник Стрїчі родаків села Руське. Орґанізатором той културно-шпортово-сполоченьской події є Лїсосільскогосподарьске і урбарьске общество фундушів Руське, котре має свій центер в містї Снина.

Головный проґрам на родаків із Руського, а і навщівників, чекать в суботу 2-го юла. В рамках културного проґраму буде мож відїти співацьку ґрупу Старинчанка, співацьку ґрупу Кычера, співацьку ґрупу Зарічанка, но і головным тяглом проґраму суть выступліня Дуа Мікі і Наталія Петрашовскы і ґрупы Traky. Окрем того, участници події можуть од пятніцї брати участь і на шпортовых змаганях, припадно святковати тоту стрїчу родаків недільнов святов літурґіов.

Русиньске село Руське находило ся в окресї Снина. У 1980-ім роцї было так, як і далшы села той области, насилно выселене рїшінём комуністічных властей із причіны будованя водной преграды Старина, котра засобує водов на питя северовыход Словакії. Офіціално заникло у 1981-ім роцї.

Першый писемный документ о тім днесь вже неіснуючім селї походить із 1567-го року. Наперед належало гуменьскому панству, пізнїше дакільком родинам. В Руськім всокотив ся сільскый цінтерь і каплічка, котра є на місцї збуряной церькви із 1789-го року. Так само там зістав воєньскый цінтерь із 1-ой світовой войны і три домы. В серединї села під цінтерём доднесь стоїть хрест із 1955-го року. З кінця бывшого села веде доднесь камяна драга з 1865-го року, тзв. Porta Rusica.

Днесь є без згоды родаків із Руського і маїтелїв земли на теріторії села зрядженый Народный парк Полонины із найвысшым 5-ым ступнём охраны. На то, жебы могли люде вступити на свої фундушы, срїтнути ся на земли своїх предків, мусять мати все выбавлене поволїня.

П. М., фотоґрафія: blog.sme.sk