21. 6. 2016: Приємно несподївав літературный вечур у Театрї А. Духновіча в Пряшові
На кінцї літературного вечора на сцену вышли і публіцї ся поклонили вшыткы выступаючі: (злїва) Іґор Латта, Владїслав Сивый, Ладїслав Ладомиряк, Зузана Ковалчікова, Людміла Лукачікова і Яна Трущіньска-Сива.
З нагоды 70. народенин русиньской поеткы Кветы Мороховічовой-Цвик (влїво) на конець културного проґраму літературного вечора передала букету квітїв за головного орґанізатора Сполок русиньскых писателїв Словеньска - Кветослава Копорова.
Сполок русиньскых писателїв Словакії, Інштітут русиньского языка і културы Пряшівской універзіты в Пряшові в кооперації з умелецьков аґентуров RUTHENIAN ART і Театром Александра Духновіча в Пряшові приправили і зреалізовали літературный вечур Смутный клавн, віршы і ґітары або русиньска поезія дакус інакше (2) присвяченый памятцї на академічного маляря Михала Чабалу і писательку Марію Мальцовску.
На зачатку проґраму модераторка Яна Трущіньска-Сива підкреслила, з якой нагоды буде презентованый културный проґрам літературного вечора, а то ку недожытій 75-цї академічного маляря Михала Чабалы, котрый одыйшов до вічности перед четырнадцятьма роками, і ку недожытым 65. народенинам писателькы Марії Мальцовскій, котра нас охабила перед шестёма роками. Потім коротко росповіла о проґрамі і о выстапаючіх в нїм.
У проґрамі зазвучала поезія юбілуючіх авторів – сімдесятника Штефана Сухого і 70-річной Кветы Мороховічовой-Цвик, але і віршы Юрка Харитуна, Валерія Купкы, Владїслава Сивого і Даньєлы Капралёвой. Културну подію своёв музиков і співом збогатив Владїслав Сивый, а декламаціов Іґор Латта, Людміла Лукачікова, Зузана Ковалчікова і Ладїслав Ладомиряк, котры створили приємный і достойный културный проґрам. Авторков і сценарістков красного вечора русиньского слова і співанок была Яна Трущіньска-Сива.
На кінцї вечора председкыня главного орґанізатора того літературного вечора Сполку русиньскых писателїв Словеньска – Кветослава Копорова подяковала вшыткым выступаючім за прекрасный проґрам і вызвала на сцену юбілантку Квету Мороховічову-Цвик, якій передала букету квітїв.
У фоає Театру А. Духновіча, перед входом до салы, была мала выставка найновшой періодічной і неперіодічной пресы обчаньскых здружінь: Русин і Народны новинкы і Академія русиньской културы в СР. Выставлена русиньска преса была здарма ку діспозіції участникам літературного вечора, што они і выужыли при вступі і одходї зо салы.
Тот вечур, як єдна із супроводных акцій 7. річника Міджінародной лїтнёй школы русиньского языка і културы на Пряшівскій універзітї – Studium Carpato-Ruthenorum 2016, ся одбыла 20. юна 2016 на Великій сценї Тетру Александра Духновіча в Пряшові.
A. З., фоткы автора