21. 5. 2019: День Русинів тот рік в Мішколцї
День Русинів Мадярьска тот рік одбуде ся в Мішколцї. Всердежавне русиньске самосправованя в Мадярьску запрошать на шторічну подію під назвов „Русинськоє Націоналноє Сято„ на суботу, 25-го мая 2019-го року, до просторів Мішкольской універзіты. Покровителём тогорічного русиньского дня став Др. Жолт Шемєн, заступник премєрміністра Мадярьска про вопросы народностной політікы, реліґії і народностей.
Передадуть Премію Антонія Годинкы
Як інформує головный орґанізатор, одкрытя події буде на саме полїдне, коли в Авлї Мішкольской універзіты приговорить ся Ріхард Тірчі, ведучій Главного оддїлїня премєрміністра про вопросы конфесійных і народносных контактів. Участным ся має приговорити і Др. Янош Ковач, головный нотарь уряду области Боршод – Абов – Земплін, під котру належыть і Мішколць.
По приговорах буде слїдовати передаваня Премії Антонія Годинкы. Премії лавреаты дістануть з рук Віктора Крамаренка, председы Вседержавного русиньского самосправованя. По тій части проґраму участны помолять ся Паракліс, котрый одслужыть владыка Атаназій (Орос), єпарха Мішкольской ґрекокатолицькой єпархії.
Народне свято Русинів Мадярьска обогатить і концерт Заслуженого академічного закарпатьского народного хору під веджінём Наталії Петій-Потапчук.
День Русинів Мадярьска
День Русинів є в Мадярьску выголошеный на 22-го мая. В тот день у 1703-ім роцї Томаш Есе в Береґсасї підняв прапор і залучів підкарпатьскых Русинів до ослободженецькой войны Ференца Ракоція ІІ. Ракоцій пізнїше назвав Русинів за їх вірну службу Gens fidelissima – найвірнїшым народом.
Вседержавне русиньске самосправованя орґанізує тото свято каждый рік в іншім містї. В році 2018 Русины Мадярьска святковали свій день в місті Еґер.
Петро МЕДВІДЬ, лем.фм