21. 4. 2023: Миколай КОНЕВАЛ: Камюнко моя наймілїша, Фарізеї (Стихы)

Миколай Коневал

 Камюнко моя наймілїша 

Камюнко, Камюнко

моя наймілїша

розмышлям о тобі

сердце ня потїшать

 

Камюнко, Камюнко

яёчко в гнїздочку

розмышлам о тобі

у своїм сердечку

 

Яєчко в гнїздочку

у тихій долинї

розмышлям о тобі

у ночнїй годинї

 

Быв я в чуджім світї

далеко за морём

тяжко мі там было

Камюнко за тобов

 

Іщі тяжше было

в Рождественны свята

Камюнко наймілїша

слызами заллята

 

Співали мы в церькви

неєдну колядку

я духом быв дома

думав на Камюнку

 

Вернув я ся дому

здалека – споза моря

обнимав я тебе

Камюнко дорога

 

Пришов єм уж дому

уж єм і в Камюнцї

небо розъяснило

сонце засвітило

 

В церькви отворены

нашы святы дверї

клякну перед ікону

Пресвятой Матери

 

Дяковав я Богу

Кампнко і тобі

же-м не остав в світї

десь у чуджім гробі

 

Богу я дяковав

же виджу Камюнку

свою любу жену

і цїлу родинку

 

Камюнко ты моя

родиско наймілїше

вінчую ті щастя

і вшытко найлїпше

 

Жебы-сь росла дале

росла проквітала

бы не загынула

твоя давна слава

 

Фарізеї

Ісус пришов меджі своїх

свої ёго не прияли

злостный сміх з нёго робили

і всягды го огваяли

 

Не робить ся так і днесь

у днешнїм модернїм світї?

Ты знаш Господи з небес

як терьплять невинны дїти

 

І днесь шомруть фарізеї

і шырять грїшны вырокы

ничать Господи алеї

справедливым чінять мукы

 

Чом то роблять безбожници

скрываючі ся за Бога

всягды – дома на уліцї

чути лем фалошны слова

 

Пыха, гордость – людьска псота

опановала тот днешнїй світ

тяжка боляча хворота

Божой любви в світї нїт

 

Фарізейске выношіня

і копаня до другого

тото днешнє поколїня

видить лем себе самого

 

Ты то знаш Господи Боже

як у днешнїм світї жыти

ты будеш Господи Боже

на страшнім судї судити

(Выбране з Літературного конкурзу Марії Мальцовской 2020.)