21. 4. 2021: Молода авторка вертать ся ку своїм корїням і ожывлює русиньску дїдовизну в фотоґрафіях

Марія Ґалишінова має русиньске походжіня. Ку своїм корїням вырїшыла навернути ся через тото, чім найвеце любить занимати ся – фотоґрафію. І так выникла серія знимок, котру теперь мож відїти в рамках выставкы під назвов Ожывлїня дїдовизны русиньской културы.

Молоды з русиньскых сел одходять, а старшы зіставають одрїзаны од решты світа, многораз в самотї, но в оточіню непоскверненой природы і духа културной і історічной дїдовизны предків того краю, пише ся в анотації выставкы молодый авторкы.

Якраз тот богатый одказ хоче Марія Ґалишінова припомянути, і єдночасно верать ся тым ку своїм коріням.

„Кедьже мій отець і цїла ёго родина суть Русины, тота тематіка є барз мому сердцю близка. Цїле своє дїтинство єм ходила на вакації ку старым родічам до села Гостовіцї, котре дотеперь з надхненём навщівлюю. Вдяка родинї, приємній носталґії, природї, приятелям, співанкам, памяткам, традіціям, автентіцітї і погостинности жытелїв,“ говорить молода фотоґрафка і авторка споминаного проєкту.

За помочі умелецькой фотоґрафії Ґалишінова має намір ожывити красы русиньской културы і приближыти їх шыршому кругу людей. Выставку мож од 19-го апріля 2021-го року відїти аж до їй закінчіня в селї Гостовіцї, Сниньского окресу, перед сільскым урядом. Пак буде єденадцять умелецькых фотоґрафій, котры суть выставлены, подарованых старостови села, і знимкы будуть далше окрашати інтерьєр містного културного дому.

Покля вам до Гостовіць іти далеко, Марія Ґалишінова думала і на вас. Експозіція проходить і в онлайн просторї , жебы ся ку знимкам міг дістати каждый. Так само ся там дасть посмотрити і на то, як выникав проєкт вдяка супроводным фотоґрафіямОнлайн выставку найдете за тым мотузком.

Марія Ґалишінова закінчіла маркетінґову комунікацію на Універзітї Коменьского в Братїславі. На высокій школї під веджінём фотоґрафа Матуша Заяця розвивала і свої ґрафічны а фотоґрафічны способности. Моментално жывить ся як фотоґрафка. Проєкт Ожывлїня дїдовизны русиньской културы зреалізовала з фінанчнов дотаціёв із Фонду на підпору културы народностных меншын.

 

Петро МЕДВІДЬ, ЛЕМ.фм, языкова і ґрасфічна управа: ред. АРК в СР,

фотоґрафія: Марія Ґалишінова.

 

Script logo