21. 4. 2021: Знова представлена цїнность Кралицького творів

Анатолій Кралицькый належыть меджі найвызначнїшы особности русиньской історії і літературы. Но з ёго творчостёв довгый час не мали сьме можливость аж так добрї познакомити ся. Тото ся мінить в остатнїм часї. Рік тому інформовали сьме, же з нагоды 125-ой рочніцї смерти і 185-ой рочніцї народжіня Кралицького вышла публікація під назвов Анатолій Кралицькый Творы.

Тоту редакчно приготовив Валерій Падяк, науковець, высокошкольскый педаґоґ і выдаватель, котрый занимать ся русиньсков літературов і драматурґіёв, вєдно із молодым науковцём Михалом Павлічом, котрый так само занимать ся літературнов творчостёв Русинів, і вєдно з Падяком робить як одборный асістент на Інштітуті русиньского языка і културы Пряшівской універзіты в Пряшові.

Теперь єднакый літературознательскый тандем приготовив про заінтересованых чітателїв вже другу книжку творів того русиньского писателя, публіцісты, історіка, етноґрафа і монаха Чіну святого Василія Великого під назвов Князь Лаборець: Выбраны творы.

Цїнность Кралицького творів

Скоро 400-сторінкова публікація зачінать вступом, котрый вже традічно приготовив „кралицьколоґ“ Валерій Падяк. Кедь пишеме „кралицьколоґ“, тото названя про Падяка заслужене.

То якраз він уж од 1980-ых років одкырвать, наперед про себе, пак і про нас цїнность Кралицького творів, сістематічно на тім робить, і вдяка тій сістематічній роботї за остатнїй рік і пів є выдрукована вже друга книжка, котра творчость єдной із найвекшых русиньскых особностей діставать ку шыршым масам, якы мають о тему інтерес.

В публікації Князь Лаборець: Выбраны творы (Князь Лаборець є єден із Кралицького прозовых творів) мож найти творы того родака Чабин в окремых частях Проза, Переклад и адаптація, Из історії Чина св. Василія Великого і Публицістика.

Довєдна едіторы выбрали 32 Кралицького текстів націонално-патріотічного прямованя. Выберати в ёго припадї є з чого, бо зохабив по собі понад 400 творів.

Чітатель ся так дістане ку текстам як вже спомянутый Князь ЛаборецьНе ходи, Грицю, на вечерниці!ЭкзекуторО давной панщиніСело Выдренувка ці ку історічным нарисам василіяньскых монастырів у Марія-Повчі, Мукачові або Краснім Бродї. Але книжка обсягує і много іншого, а не менше інтересного.

Далша цїнна публікація

Так як в припадї попереднёго выданя Падяка і Павліча (Анатолій Кралицькый Творы), і ту мож конштатовати, же іде о цїнный матеріал, котрым сплачаме як народ свій довг Кралицькому, тій „унікатній особности русиньской літературы добы будительства,“ як пишуть авторы.

Кедьже публікація має одборне спередслово, є збогачена множеством позначок під чаров і пояснїнями контекстів, найновіше выданя бізовно оцїнять науковцї-русіністы.

Но єдночасно книжка приносить Кралицькым писаны майстровскы тексты, за котры не мусили бы ся ганьбити ани векшы од Русинів народы, і так є публікація добра і про вшыткых Русинів, котры хотять спознавати свою, много раз не меншу од світовых авторів, літературу.

 

Петро МЕДВІДЬ, ЛЕМ.фм, языкова і ґрафічна управа: ред. АРК в СР

Script logo