21. 2021: Як нам іде самосписуваня? Офіцияльны списовы материялы по лемківскы

Од 1. квітня/апріля тырват в Польщы Нацийональнe Повселюдне Списуваня, якє буде проходило до кінця вересня/септембра. Покля што польскій Головный Статистичный Уряд не публикує частичных даных – як робит тото, напримір, Словация – односячых ся до чысла списаных на дану хвилю жытелів польской державы.

В тых днях, дакус з опізніньом, явили ся на офіцияльным сайті списуваня, кампанійны материялы і в тлумачыню на лемківскій язык. Окрем лемківскоязычных летучок і плякатів, сут тіж материялы в інчых меншыновых языках, но і очывидно по польскы.

Рахуєме ся – для себе і другых. Лем ци вшыткы?

Хоц до кінця списуваня лишыло ся іщы кус часу, заєдно Головный Статистичный Уряд та ріжного рода активісты і плятформы заохочуют, жебы не одкладати того на остатній момент.

Тогорічный спис – бодай найбільше в дотеперішній істориі списів – одкрытый єст на підреперуваня статистик нацийональных і етнічных меншын. Жаль лем, же декотрых. Тым разом не іде о Лемків, якы дост часто через польскых урядників сут асоциюваны з украіньском меншыном, але іде о Шлезаків – найбільшу етнічну меншыну на обшыри Польской Республикы, яка дотепер не єст офіцияльно вызнана через власти в Вашраві за меншыну, а што за тым іде – ніт такой меншыны серед вшыткых інчых нацийональности, котры громадянин може выбрати при списі. Другом меншыном, котра єст систематичні іґнорувана через урядників і тенденцийных експертів, сут Вілямовяне – невелика етнічна ґрупа, яка фурт намагат ся на своє вызнаня і вызнаня вілямівского як реґіонального языка.

На вебсайті Нацийонального Повселюдного Списуваня находят ся материялы по лемківскы. Сут то летучкы і банеры, якы были переведены з польского на лемківскій через робітників нашого радия. Вшыткы они сут допущены до свобідного хоснуваня і пропаґуваня серед осіб, якы приналежат до даной спільноты.

Єднак в тых днях дошло до незрозумілого інциденту звязаного з промоцийныма материялами Шлезаків. Два дни на інтернетовым сайті катовицкого одділіня Статистичного Уряду поміщены были материялы переведены на шлезскій язык, но пак были зняты. Подля шлезскых орґанізаций і активістів єст до дальшый доказ на іґноруваня меншыновых прав той найбільшой етнічной ґрупы в Польщы. Подібні было з материялами по вілямівскы.

Допереду разом

Остатні місяці своі кампаніі ведут русиньскы (лемківскы) орґанізациі і плятформы. Наша редакция одраз долучыла до загальнорусиньской кампаніі, жебы заохотити вшыткых деклярувати в списі лемківску нацийональніст і лемківскій язык як материньскій. Хоц списуваня тырват уж такой пілтора місяця, то надале актуальным лишают ся госла направлены головно до самых Лемків, жебы гордо деклярували своє походжыня.

Окрем загальнорусиньской кампаніі («Сме Лемкы»), котру в Польщы найактивнійше веде Стоваришыня «Руска Бурса» в Ґорлицях, до котрой долучыло тіж Стоваришыня Лемків, ведена єст іщы єдна кампанія, орґанізувана через середовиско молодых активістів з Вроцлавя під назвом «ЯЛемко». Остатнім часом під промоцийныма материялами зрыхтуваныма активістами з ґрупы «ЯЛемко» декляруючо підписали ся Стоваришыня Лемків, Стоваришыня «Руска Бурса» в Ґорлицях, Музей Лемківской Культуры в Зындрановій, Лемківскій Ансамбль Пісні і Танця «Кычера» та Стоваришыня «Лемко Тавер» зо Стшелец Краєньскых.

Северян КОСОВСКЫЙ, ЛЕМ.фм

(Публікуєме в оріґіналї – лемківскім варіантї русиньского языка.)

 

 

Script logo