21. 2. 2020: XXVIII. річник Карпатьской писанкы 2020

Вігорлатьскый музей в Гуменнім як головный орґанізатор меджінародной конкурзно-презентачной выставкы крашеный яєць Карпатьска писанка 2020, ословлює шыроку публіку, жебы взяти актівну участь на події, котра буде проходити од 12-го марца до 26-го апріля 2020-го року.

Як інформовала Яна Федічова з Вігорлатьского музею, вшыткы любителї і підпорователї традіції крашіня яєць мають можливость авторьской презентації колекції своїх писанок зробленых традічнов або сучаснов техніков крашіня. Журї пак в рамках штатуту меджінародной конкурзно-презентачной выставкы оцїнює і давать нагороды авторам в окремых віковых катеґоріях і творчіх катеґоріях.

Тогорічна выставка писанок понукать і можливость їх продаваня. В припадї інтересу выставлёваня писанок і продаваня писанок мож доручіти свої колекції (на выставку максімално 10 фалатків, на продаваня не є обмеджена кількость) поштов або особно до Вігорлатьского музею до 28-го фебруара 2020. Далшы інформації односно Карпатьской писанкы 2020 мож найти на сайтї музею.

Дотеперь презентовав Вігорлатьскый музей в Гуменнім понад 23 тісяч писанок од скоро 6 тісяч авторів з Чеськой репубілы, Україны, Польщі, Мадярьска, Румунії і вшыткых реґіонів Словакії.

Петро МЕДВІДЬ, ЛЕМ.фм