21. 12. 2018: Музей Варгола выставлює унікатны образы із атентату на Дж. Ф. Кенеддія
Унікатны творы Енді Варгола представили в пятніцю, 14-го децембра 2018-го року, в Музею модерного уменя Енді Варгола в Меджілабірцях. Іде о портфолію „Flash‟ і выставлює ся на Словакії по першый раз.
Єденадцять творів захоплює атентат на америцького презідента Джона Фіджералда Кенеддія. Образы пожычав найвешкій стабілній експозіції краля поп-арту в Европі пріватный збератель. Інформовав о тім словацькый денник Korzár.
Першый раз на Словакії
Портфоліо Варгола під назвов „Flash‟ є комплетне, навеце означене як унікатне. На Словакії тото портфоліо іщі не выставлёвало ся. Ёго вартость є приблизно 120 000 евр.
„Іде о серію єденадцятёх образів із 1960-ых років. Захоплюють три днї по атентатї на америцького презідента Кенеддія. Ендія ани так не заінтересовав тот атентат, як медіалне біснїня, котре потім спустило,“ повів о новій експозіції директор Музею модерного уменя Енді Варгола Мартін Цубяк.
Пріватный збератель пожывав музею в Меджілабірцях тоты унікатны творы на невстановлено довгый час.
Нетіпічна подоба
Творы Варгола зображують презідента тїсно перед наступлінём до авта, ёго сміючу ся жену Джекі, пушку, із которой ся стрїляло, облак, із котрого убийця стрїляв, убийцю на поліцайній станіцї в Далласї і фраґменты аґентурьных вістей інформуючіх о шокуючій дії.
„Тота дія была єднов із найслїдованішых 20-го столїтя і Варгол як документатор добы і їй важных пунктів не міг тоту тему выхабити. Обробив єй в нетіпічній поп-артовій подобі до візуалного концепту,“ повів Цубяк.
Образы суть як кебы розмазаны за фоліёв, што сімболізує нелем безперерывный тиск пресы і высыланя новостей, котры приносили все новы і новы інформації, але і таємніцю, як ся цїла дія, котра травматізовала цїлу сполочность, одограла. Варгола фасціновала всядыль участна емоціонална сила медій, пише словацькый денник.
О музей є інтерес
Навщівность унікатного Варголового музею має піднимаючу ся тенденцію. В тім роцї підняла ся о приблизно 30 процент і музей ся тїшыть, же прибывають навщівници із Словакії. В минулости было веце загранічных гостів, главно із сусїднїх держав. Окрем Антарктіды, мають подля слов лекторкы Ярмилы Сухой навщівників із каждого контіненту.
Петро МЕДВІДЬ, лем.фм, жрідло фотоґрафії: Revolver Gallery.
