21. 1. 2022: Елена ХОМОВА-ГРІНЁВА: Я жена, Не згорить ружа (Стишкы)

Елена Хомова-Грінёва

 

Я жена

Я дїтина

жывого Бога

як з Біблії

Сара, Ребека,

Естер, Рут,

Марія, Марта.

Я жена-мати

обдивована,

хвалена,

любена,

нераз ненавіджена.

Мам свою цїну

хоць світ не зміню.

Мої рукы рушають

колысков,

як успавам дїтину.

Моя сила – то

молитва Господу

высылана до неба

за спасу,

за покій,

за родину,

за здравя.

 

Не згорить ружа

Міцно тримлю

ружу в руках,

няй не згорить

в обятю

поломіня.

Любовёв здвоєны

нашы сердця,

урчены давати тепло.

Грїти,

любити,

дозрївати,

жычіти.

Єден другому

до смерти

даром быти.

 

(Выбране з Літературного конкурзу Марії Мальцовской, рік 2021; 3. місто)