21. 1. 2021: Представителї Свідника припомянули собі ослободжіня і на Дуклї

Свідницька радніця про пандемію не орґанізовала тот рік пєтны акты з нагоды 76-ой рочніцї ослободжіня міста, кедьже Словакія є в локдавнї.

Но пріматорка міста Марцела Іванчова вєдно із своїм заступником Михалом Ґоріщаком выразили у віторок, 19-го януара 2021-го року, почливость ослободителям індівідуално. Інформовала о тім аґентура ТASR.

„Памятник совєтьской армады у Свіднику днесь творить неоддумательну часть сілуеты Свідника, а іщі выразнїше творить сімбол складной войновой історії міста. Ту ся стрїчать історія і сучасность нашого міста. Іде о веце як 9000 людьскых жывотів, скоро тілько, як має теперь Свідник жытелїв. Были далеко од домова, де їх даремно чекали матери, жены ці дїти. Воздушнов чаров пару сто кілометрів, но про тых хлопів уж нездолательна далекость,“ повіла Іванчова.

І кедь памятник за їй словами є повязаный з терпінём, болестёв і стратов, спринимать го і в повязаню з атмосферов тиха, покоя і міру.

„Тоты вояци перемогли, жебы мы жыли в мірї. Є першорядов нашов повинностёв, нашым довгом односно тых павшых, жебы сьме го всокотили і хранили. Лем так їх жертвы не будуть даремны,“ конштатовала пріматорка Свідника.

Іванчову зенпокоює, же в сучасности вопрос войны і міру злегшать ся і баґетелізує, росне екстремізм, счезать толеранція і порозуміня. „Я пересвідчена, же вшыткы мусиме усвідомити собі свою частку одповідности, і пропоновати способы, як тот планый тренд одвернути,“ доповнила.

Память павшый героїв учтили собі коло памятника на Дуклї, у Свіднику, і коло памятника армадного ґенерала Людвіка Свободы.

Петро МЕДВІДЬ, ЛЕМ.фм, языкова управа: ред. АРК в СР, жрідло фотоґрафії: Місто Свідник.