20. 9. 2020: Влада послала першы грошы на реконштрукцію Варголового музея

Першу часть грошей схваленых як дотацію влады Словацькой републікы на велику реконштрукцію Музея модерного уменя Енді Варгола в Меджілабірцях, котра мала прийти вже у януарі, в сумі двох міліонів евр уж має Уряд Пряшівского самосправного краю на своїм рахунку. Інформовала о тім пресаґентура TASR.

„То сіґнал, же проєкт іде подля планованого заміру і влада нам схвалила державну поміч в повній сумі 7,1 міліона евр,“ інформовав у пятніцю 18-го септембра 2020-го року Пряшівскый самосправный край на своїм сайтї на сітї Facebook. Якраз край є зряджователём Варголового музея.

 

Сповниме собі великый малый сон

„Сьме щястны. То значіть, же вшытко піде подля схваленого плану і будеме годны зачати далшы роботы прямены до того, жебы сьме могли зачати комплексну реконштрукцію, і сповнити собі великый малый сон о красшім, лїпшім і новім Музею 2.0,“ реаґовав на інформації Мартін Цубяк, директор музея.

Музей за словами Цубяка буде в слїдуючіх місяцях робити на дороблїню реалізачного проєкту. Тот не є треба ку будованю, но музей го хоче і так, жебы „не были просторы про шпекулації при реалізації“ пояснив директор.

 

Юбілейна сезона

Зачаток ставебных робот Цубяк очекує на кінцю лїта слідуючого року. І то з причіны, же буде треба зробити обстараваня, а кедьже інвестіція є велика, буде то треба реалізовати посередництвом европского віснтика.

Втогды бы ся музей і мав заперти по юбілейній сезонї. „Слїдуючій рік будеме мати 30-ту рочніцю основаня музея, будеме робити святкованя. Значіть, тїшыме ся, же буде і простор про діялность музея і вєдно з юбілеём запреме музей і одкрыєме реконштрукцію,“ повів про аґентуру директор.

 

Дотація в сумі 7,1 міліона

Дотацію в сумі 7,1 міліона евр на комплексну реконштруцкію вонкашнїх і внутрїшнїх просторів Музея модерного уменя Енді Варгола схвалила бывша влада під веджінём Петра Пеллеґріні на своїм выїздовім засїданю.

Цілём є зъєдинити інтерьєр із екстерьєром і значно змодернізовати музей про 21-ше столїтя. Тому має помочі і такзвана конштрукчна респонзівна фасада, котру Цубяк прирівнять ку Помпіду в Паріжі.

Музей модерного уменя Енді Варгола в Меджілабірцях выникнув як першый Варголів музей у світї, доднесь є єдиным у Европі. Другый находить ся у Піттсбурґу.

Петро МЕДВІДЬ, лем.фм, жрідло фотоґрафії: Prešovský samosprávny kraj, языкова управа: ред. АРК в СР.  .

Script logo