20. 8. 2021: На кінцю авґуста русиньскый одпуст в Мадярьску

Русиньскый одпуст в селí Шаёвпалфала має вже свою традіцію.

Послїдню недїлю того місяця, 29-го авґуста 2021-го року, в селї Шаёвпалфала одбуде ся традічный русиньскый одпуст при Павловскій чудотворній іконї Пресвятой Богородіцї.

Орґанізатором події є містна ґрекокатолицька парохія і Русиньска самосправа Шаёвпалфалы, з підтримков Канцеларії премєра Мадярьска, Вседержавной русиньской самосправы і далшых містных русиньскых самосправ і орґанізацій в Мадярьску. Одуст є і народным святом Русинів в тій державі.

Торжество зачне в містнім храмі утренёв, по котрій буде одслужена літурґія. Тоту буде служыти преосвященый владыка Атаназ Орос, єпіскоп Мішколцьской ґрекотолицькой єпархії. На події ся участным приговорить і Віра Ґіріц, посланкыня за Русинів у мадярьскім парламентї.

Одпусты в Шаёвпалфала

Село Шаёвпалфала (мад. Sajópálfala, стара славяньска назва Павлово) находить ся в Боршодьско-абовско-земпліньскій жупі в окресї Мішколц. Ґрекокатолицька парохія, котра находить ся лем 11 км од Мішколца, записала ся до історії тым, же там слызыла ікона Пресвятой Богородіцї.

В містнім храмі од праздника Рождества, за старым календарём, аж до 16-го януара 1717-го року, слызыла ікона, котра была на престолї. Зачало то почас літурґії в першый день праздника Рождества.

Ікону на приказ яґерьского римокатолицького єпіскопа пак однесли до міста Яґер і там єй скрыли. Хоць многы ґрекокатолицькы священици і єпіскопы в історії просили, жебы їм ікона была вернута, 256 років віруючі не знали, што є із Павловсков чудотворнов іконов і як вызерать, бо з нёй не была зроблена ани копія. Аж 25-го октобра 1973-го року была ікона римокатоликами вернута до храму в селї.

Петро МЕДВІДЬ, ЛЕМ.фм. Ґрафічна і языкова управа: АРК в СР.