20. 7. 2017: В Попрадї проходить лїтня школа про дїтей із Войводины

Як інформовала аґентура Рутенпрес, од понеділька 17-го юлія до недїлї 23-го юлія 2017-го року в Попрадї на Словакії проходить Лїтня школа русиньского языка, на котрій бере участь 30 русиньскых школярів зо сербской Войводины. Є то вже тертїй річник лїтнёй школы.

На школї беруть участь школярї основых школ, головно зо шестой і семой клас, в котрых є навчалный язык русиньскый або ся учіть русиньскый язык як волительный предмет. Суть то школярї, котры досягли в рамках школьского року добры резултаты в учіню і змаганю. Того року має своїх школярїв на лїтнїй школї Руськый Керестур, Коцур, Дюрдёв, Вербас, Кула, Новый Сад, Суботіця, Новый Орахів, Шид, Беркас і Бікіч.

На лїтнїй школї мають участници лекції з русиньского языка, історії, ґеоґрафії, реліґії і музичной выховы. Окрем того, занимають ся шпортовыма актівностями, але і інформатіков, на котрій ся дїти учать наприклад як наіншталовати русиньску клавіатуру на компютерах. Коло того про них были приготовлены і навщівы околіцї – Старой Любовнї ці Штырбского плеса.

Жрідло фотоґрафії: Рутенпрес

П. М.