20. 6. 2018: Через вікенд фестівалы в Біловежі і Меджілабірцях
Найблизшый вікенд русиньска култура в подобі народной музикы і говореного слова завітать до села Біловежа і до Меджілаборець. На обиддвох подіях буде што посмотрити
Свята будителїв
Свято русиньскых будителїв Духновіча і Павловіча є назва вже 37-го річника фолклорного фестівалу в селї Біловежа, в окресї Бардеёв. Тот буде проходити в неділю 24-го юна 2018-го року і проґрам подля орґанізаторів, котрыма суть окрем села Русиньска оброда на Словеньску і Вышнёшарішскый центер културы, буде досправды богатый.
Цїлоденый проґрам зачне літурґійв у містній ґекокатолицькій церькви, котра буде по церьковнославяньскы. По ній одбуде ся споминова подія на будителїв Александра Духновіча і Александра Павловіча на дворї містной фары. Обидвоми будителї в селї служыли на парохії. Од фары піде наслїдно кроёва маніфестація на амфітер, котрый є коло Сільского уряду.
Проґрам на амфітеатрї зачінать о 14.00 год. Участны ся можуть тїшыти на выступы такых колектівів і інтерпретів як Барвінок, Біловежанка, дуо Шуркаловых, дуо Карашовых Вінок ці гостів із Україны – дуо Верохинка і ґрупу Фатёви. Русиньске слово одпрезентують Миколай Коневал і Іґор Латта (аліас Кум Мачанка).
В рамках події одбуде ся і выставка образів русиньскых малярів, котру буде мож відїти в салїі културного дому.
В Меджілабірцях знова і шпортово
В Меджілабірцях од пятніцї буде проходити вже 56-ый річник Фестівалу културы і шпорту, котрый орґанізує місто Меджілабірцї у сполупраці з Русиньсков обродов на Словеньску. Головный проґрам, де мож відїти найвеце русинського репертоару, буде проходити в неділю 24-го юна, хоць наш професіоналный ПУЛЬС є напланованый на суботу вечур.
В недїлю ся на сценї містного амфітеатру представлять Скеюшан з Чеськой републікы, Фолклорна ґрупа Камяна, Співацька ґрупа Калина, Лабірьскы бетяре, Тріо Кантарь ці популарне Русиньске тріо, котре популаріту здобыло выступанём в телевізній шов „Zem spieva.‟ Головным тяглом русиньского проґраму в недїлю буде ґрупа Русин Чендеш Орхестра.
Комплетный проґрам обидвох подій можете найти на плаґатах зверьху статї.
Петро Медвідь
