20. 4. 2016: Русины Мадярьска припомянули собі Ференца Ракоція ІІ.

Як інформує сайт „Вcедepжaвного Русинського Caмoсправованя“ в Мадярьску, 2-го апріля 2016-го року у містї Шарошпоток в парку Музея Ракоція 450 Русинів праздновало 340-ту річніцю од дня народжіня князя Ференца Ракоція ІІ.

В Мадярьску быв у 2015-ім роцї день народжіня Ференца Ракоція ІІ. мадярьскым парламентом выголошеный за памятный день, чім ся, як ся пише на сайтї, „підкріпило ниґда незагасаюче чувство честованя Русинами, gens fidelissima, памяти Великого Княза“. Як „gens fidelissima“ (найвірнїшый народ) были Русины названы якраз Ференцом Ракоційом ІІ. Названя собі выслужыли за свою вірность, кідь в рр. 1703 – 1711 по боцї Ракоція Русины боёвали в неуспішнім бунтї проти Габсбурґів. Тот быв у тім часї князём Трансілванії і паном Мукачовского замку.

Свято Русинів зачало Святов літурґіов у Ґрекокатолицькій церькви свв. Петра і Павла, по котрій ся приговорив участным пріматор (мер) Шарошпотока Янош Арош. Тот підкреслив, як важне є припоминати собі Ракоція у жывотї міста. Віра Ґіріц, котра заступать Русинів Мадярьска в мадярьскім парламентї, інформовала участных о своїм выступі в парламентї почас пленарного засїданя, котре проходило 29-го марца 2016-го року і было присвячене споминаному юбілею. Далше в рамках проґраму іщі выступили директорка Музея Ракоція Др. Едіт Томаш, на святчонім концертї обогатили подію школярї Основной школы Ференца Ракоція ІІ. і школярї Шарошпотоцькой школы уменя.

На закінчіня праздника выступали в парку каштеля, де ся Ракоцій народив, Янош Арош, пріматор міста, Віра Ґіріц, преставителька Русинів у мадярьскім парламентї, Віктор Крамаренко, председа „Вседержавного Русинського Самосправованя“ (ВРС), Ольґа Сілцер-Ліковіч і Янош Соноцкі, підпредседове ВРС, Янош Кожняньскый, председа „Общества Русинув/Рутенув Мадярщины“ і „Шарошпотокського Русинського Націоналного Самосправованя“, председа Ревізной комісії ВРС і директорка Музея Ракоція Др. Едіт Томаш. Потім вєдно із множеством містных жытелїв положыли вінцї ку памнятнику Ференца Ракоція ІІ. і заспівали русиньску гімну.

П. М.