20. 3. 2020: На сітуацію з коронавірусом реаґують і міста в русиньскых реґіонах. Шыють маскы

Од понедїлька, 16-го марца 2020-го року, суть на Словакії заперты вшыткы склепы, окрем тых з потравинами, апатык і дроґерій. Влада в повязаню з наряджінями, жебы забранити пошырёваню коронавірусу, заперла і граніцї зо сусїднїма державами а контролює їх, припадно їх контролюють словацькы сусїды.

Но жытелїв найвеце трапить недостаток охранных средств. Іде передовшыткым о охранны маскы на тварь. І кедь словацька влада вже обїднала маскы в дакілько міліонах фалатків, маскы підуть главно до здравотницькых заряджінь. З недостатком того сортіменту ся так мусять самосправы – міста і села, вырівнати по свому. На сітуацію реаґують і міста в русиньскых реґіонах як Снина, Меджілабірцї ці Свідник.

Снина шыла маскы як перша

Як перша на сітуацію зареаґовала Снина. Місто і посердницьтвом своёй пріматоркы Даньєлы Ґаландовой вже 12-го марца інформовало, же містьскый подник зачав шыти охранны маскы, котрых є недостаток. В тім часї іщі ани не быв выголошный надзвычайный стан, но были уж прияти дакотры нардяджіня. Люде на обїднаны маскы, котры ся купують, могли чекати од віторка, 17-го марца. Маскы собі треба было обїднавати в мінімалній кількости 10 фалатків.

В Снинї ани робітници соціалной службы не зістали холодныма в повязаню зо сітуаціёв коло корнавірусу. Про тых наймешных з вылученых комуніт жытельства ушыли безплатно дїтячі охранны маскы. А свій вклад дала і сама пріматорка, котра через вікенд так само шыла охранны маскы.

Меджілабірцї шыють на урядї

В намазї о охрану своїх робітників перед можливов інфікаціёв новым коронавірусом зачав і Містьскый уряд в Меджілабірцях шыти охранны маскы на тварь. Ініціатіва самосправы має подля слов пріматора Владислава Вышнёвского покрыти лем властны потребы, на высшу продукцію не мають капаціты, інформовала аґентура TASR.

„Радо бы сьме шыли і про жытелїв, але не сьме на то технічно, ани матеріално забезпечены,“ повів пріматор з тым, же свойпомічна выроба масок є єдиным способом, як тоты охранны средства про своїх робітників забезпечіти.

Маскы про майже 100 робітників міста включно теренных соціалных робітників і містьскых поліцайтів шыють три робітничкы Містьского уряду. Денно зроблять коло 80 фалатків. Матеріал, котрый місто має, може ся хосновати на єдноразову маску, значіть мусять шыти все новы.

Пріматор аґентуру TASR інформовав, же подобным способом собі охранны средства забезпечують і останї жытелї міста.

Свідник маскы роздавать, наперед сеніорам

Місто Свідник в повязаню зо сітуаціёв забезпечує охранны маскы про жытелїв. Наперед їх од міста діставають найстаршы жытелї, котры суть найвеце різіковыма. Радніця такой зачала приготовлёвати і простор про припадну госпіталізацію пасцьєнтів або про людей в карантенї.

„Маєме намагу нелем реаґовати на сітуацію, котра актуално єствує, але і робити крокы допереду. Окрем предписаных наряджінь, сьме прияли і далшы крокы над рамкы тых приятых,“ повіла про аґентуру TASR пріматорка міста Марцела Іванчова.

Подля їй слов вшыткы робітници Містьского уряду дістали охранны средства. Єдночасно свідницькы технічны службы дезінфікують в містї місця, котрых ся люде дотуляють. То значіть лавочкы, гріска про дїти, вшыткы місця, з котрыма люде приходять до прямого контакту.

Од понедїлька місто зачало роздвати охранны маскы. Тоты ішли женам, котры ся старають о людей і суть в теренї, містьскым поліцайтам і теренным робітникам обще. І там, окрем обїднаных масок, мають і маскы, котры шыє містьскый подник. 500 масок мають роздати найстаршым жытелям.

Роздаваня піде подля віку. „Підеме од найстаршых ку наймолодшым жытелям. Значіть, зачнеме у 80-рочных, 70-рочных, пак подля кількости масок, котры ся нам актуално подарить забезпечіти, будеме продовжовати в дістрібуції масок і далше,“ додала пріматорка.

Петро МЕДВІДЬ, ЛЕМ.фм

Script logo