20. 2. 2021: Вечер памяти Юрия Новосільского

  • • Ю. Новосільскій, портрет авторства З. Кресоватого

    • Ю. Новосільскій, портрет авторства З. Кресоватого

21. лютого/фебруара 2021 р. мине 10 років од смерти Юрия Новосільского, єдного з найвызначнійшых лемківскых артистів, філософів і теолоґів. З той нагоды інституциі, якы занимают ся популяризацийом творчости Новосільского, рыхтуют в тот ден специяльный вечер памяти.

Памят і передуманя

В ден округлой річниці смерти, в неділю, 21. лютого/фебруара, Музей Ікон в Варшаві і Центр Сакральной Штукы ім. Новосільского, якій діє при православній парохіі Успіня Пресвятой Богородиці в Кракові, запрашают на специяльный вечер памяти посвяченый артисті.

Стріча одбуде ся в парохіяльных просторах в Кракові. З причыны пандемічных ограничынь ведена буде через трансмісию онляйн на фейсбуковым фанпейджы Музею Ікон. Вечер памяти зачне ся молитвом за покійного, по котрій буде концерт церковной музикы в выконаню мужского хору «Катапетасма».

Пак вызвучыт выклад Віталия Міхальчука під наголовком «Іконостас – синтеза штукы в літургіі – православна традиция і творчіст Ю. Новосільского». Гевса прелекция буде введніньом до більшой конференциі посвяченой артисті, яка зорґанізувана буде Музейом Ікон наступного дня. Пройде она під наголовком «Іконостас в православній літургіі і творчости Ю. Новосільского». Буде так само трансмітувана онляйн, в понедільок, 22. лютого/фебруара.

На понедільковій конференциі зо своіма прелекциями выступлят знавці творчости Новосільского і православной літургікы. Православный священник о. Генрик Папроцкій розповіст про теолоґічну і літургічну ґенезу іконостасу, зас римокатолицкій єпископ Михал Яноха о традициі іконостасів в штуці давной Польщы. Др Кристина Черні, біоґрафка Новосільского, буде бесідувала о новых одкрытях сакральной творчости артисты, др Ірина Татарова о візиі іконостасу в філософіі П. Фльореньского і Ю. Новосільского. Лукаш Гайдученя выголосит выклад на тему іконостасу в мизичній акциі літургіі.

Юрий Новосільскій

Юрий Новосільскій народил ся 7. січня/януара 1923 р. в Кракові в родині лемківского походжыня, котра за роботом пришла до міста, але перше жыла в селі Одрехова, недалеко Санока.

Малярскы академічны студиі робил надзвычайні долго. Зачал іх за німецкой окупациі в 1940 р., пак од 1945 р. продолжал, жебы закінчыти іх аж в 1961 році. Дале остал професором краківской Академіі Куншту.

Малювал акты, натурморты, пейзажы, але найшырше знане єст його іконописаня. В 50. роках ХХ ст. творил розписы в чысленных римокатолицкых і православных храмах. Постепенно резиґнувал зо світской тематикы і занял ся выключні сакральном штуком. Зачал быти знаный як вызначный християньскій теолоґ і філософ.

Юрий Новосільскій отримал званя doctor honoris causa Ягайлоньского Університету в Кракові та чысленны нагороды і державны одзначыня. Все зазначал свій лемківскій рід. Вмер 21. лютого/фебруара 2011 р. Похованый є в Кракові.

Севериян КОСОВКЫЙ, ЛЕМ.фн

(Публікуєме в оріґіналї – лемківскім варіантї русиньского языка.)

Script logo