20. 11. 2020: Вмерла Мария Байко (1931 – 2020), заслужена інтерпретаторка лемківскых пісен

  • Тріо сестер Байко, злїва Даниіла (1929 – 2019), Мария (1931 – 2020), Ніна (род. 1933).

    Тріо сестер Байко, злїва Даниіла (1929 – 2019), Мария (1931 – 2020), Ніна (род. 1933).

18. листопада/новембра 2020 р. на 90 році вмерла заслужена інтерпретаторка лемківскых пісен, університетска выкладачка і лавреатка вельох нагорід, Мария Байко.

Через долгы рокы прославяла лемківску пісню вєдно зо своіма сестрамы в знаным «Тріо сестер Байко».

Мария Байко вродила ся 2. марця 1931 р. в селі Яблониця Руска близко Санока, на східніх, крайных териториях Лемковины. В родині, окрем Мариі, народили ся штырі дівкы – Зеновія, Даниіла, Ніна і Ірина. Родина Байків в 1945 р. была переселена на Радяньску Украіну до Буска в Львівскій области. Там вєдно зо своіма сестрами завершыла середню школу.

В 1947-1952 рр. вчыла ся на выділі бандуры во Львіскій музично-педаґочійній школі. Дальше в 1953-1958 рр. Мария Байко студиювала на Львіскій нацийональній концерваториі ім. М. Лисенка в класі проф. О. К. Бандрівской, а тіж парарельно продолжала науку в класі бандуры в проф. В. Гермасенка.

Істория «Тріо сестер Байко» зачала ся іщы за студенсткых часів (1953 р.). За попертьом проф. Бандрівской сестры Мария, Ніна і Даниіла Байко сфорували музичне тріо, котре неодолга стало ся знаным по цілій Украіні, але і за єй границями. В своім репертуарі часто выконували лемківскы народины пісні.

В 1957 р. тріо было нагороджене на VI Общесвітовым фестівали молодежы і студентів в Москвсі. В 1969 р. сестрам Байко признано званя «Заслужены артисткы УРСР», а в 1976 р. были одзначены премійом ім. Шевченка. О три рокы, в 1979 р. отримали званя народных артисток Украіны.

Покійна продолжала наукову роботу на Львіскій консерваториі. В 1985 р. отримала званя професора кафедры сольового співу. За рокы свойой роботы інтересувала ся лемківском музиком і піснями. Зрыхтувала вельо опрацувань.

Севериян КОСОВСКЫЙ, лем.фм

(Публікуєме в оріґіналї – лемківскім варіантї русиньского языка.)

Script logo