20. 10. 2021: Першов премєров ТАД в тій сезонї буде 12 стілцїв
На сценї буде мож відїти цїлый драматічный колектів ТАД.
Інсценація драматізації все актуалного роману 12 стілцв од Ілї Ільфа і Євґенія Петрова буде першов премєров драматічного колектіву Театру Александра Духновіча (ТАД) в Пряшові в сезонї 2021/2022.
Як за театер інформовав Йозеф Юрчішін, премєра одбуде ся в суботу, 23-го октобра 2021-го року (премєра была перенесена з 22-го октобра, позн. ред.). Драматізацію роману про театер зробила Терезія Міндошова, режійно приготовив пєсу Антон Коренчі.
Споєны дві лінії
Антон Коренчі, котрый є того часу директором драматічного колектіву Державного театру в Кошыцях, дебутовав на сценї ТАД пєсов Познатый непознатый. Подля режісера є в творчости театру чути дві лінії – часть представлїнь є фестівалова, часть про публіку.
„Думам, же амбіціёв авторкы драматізації, але і моёв, было споїти в пєсі 12 стілців обидві лінії,“ повів Коренчі, котрый думать, же тот култовый роман дає таку можность. Є збудованый на міцній темі і є вынятково гуморный, но гумор не є першоплановый,“ конштатовав.
На сценї цїлый драматічный колектів
Коренчі назначів, же од зачатку хотїв з далшыма членами реалізачного тіму Остапа Бендера і Іпполіта Воробянинова обсадити Євґеніём Либезнюком і Василём Русиняком. Наконець є роль Бендера алтернована молодым актором Володиміром Рогачом.
Директор театру Маріян Марко є радый, же дали принагоду молодому акторови. „Володя добрї запав до колектіву, хоче ся учіти. Про нас важне, же бісїдує по русиньскы і має талент. Навеце іде о молодого мужа, котрых аж так много в драматічнім колектіві не є, і є охотный робити в такых фінанчных условіях, якы в ТАД маєме,“ повів о Рогачови умелецькый шеф Любомір Міндош.
На сценї вкажуть ся властно вшыткы членове драматічного колектіву. Автором сцены і костімів є Ярослав Даубрава, музику компоновав Владимір Шарішскый, хореоґрафію робив Андрій Суханов.
Театер оцїненый
Марко інформовав, же в тій сезонї будуть мати штири премєры, причім в тім календарнім роцї іщі єдну. Признав, же обмеджіня запричінены пандеміёв суть проблемов, но є радый, же по одкрытю театру публіка знова вернула ся до театру, і єднако так є то і на селах северовыходной Словакії, де театер часто ходить выступати меджі Русинів.
Лем недавно ся русиньскый професіоналный театер презентовав на фестівалі Нова драма в Словацькім народнім театрї в Братїславі, де одограв пєсу Пісковиско. Із Братїславі собі ТАД приніс шпеціалну премію – Окрема цїна журї, за інвенчне спрацованя тексту і вытворїня чаруючой атмосферы орґанічно комунікуючой з публіков.
Петро МЕДВІДЬ, Лем.фм. Ґрафічна і языкова управа: ред. АРК в СР.
