20. 10. 2020: Вмер митрополита Теодозий – по роді Лемко. Был предстоятельом Православной Церкви в Америці

В понедільок, 19. жолтня/октобра 2020 р., на 87 році жытя вмер владыка Теодозий (Лазор), архієпископ Вашынґтону, митрополита цілой Америкы і Канады, бывшый предстоятель Православной Церкви в Америці.

Покійный владыка по роді был Лемком. Вродил ся в родині еміґрантів зо східньой Лемковины. В роках 1977-2002 очелювал ПЦА.

Сын лемківскых еміґрантів

Будучый митрополита Теодозий вродил ся 27. жолтня/октобра 1933 р. в Кенонсбурзі (Пенсильванія, ЗША) в лемківскій еміґрантскій родині як Френк Лазор. Його родиче подали ся за океан з русиньскых сел на сході Лемковины – Волі Миховой і Смільника.

В 1960 р. завершыл богословскы студиі в православній семінариі св. Владиміра в Ню Йорку. Дальше продолжал науку в Екуменічным Інституті в Боссе в Швайцариі. В тым часі одбыл поломництво до Святой Землі. Вернувшы в 1961 р. до ЗША, был постриженый на монаха. Його першом парохійом была тота при церкви Роджества Пресвятой Богородиці в Медісон. Был так само помічным войсковым капеляном.

В 1967 р. был хіротонізуваный на владыку, помічного єпископа вашынґтоньской єпархіі і тымчасового адміністратора Алясканьской єпархіі. На Алясці провюл одбудову собору св. Михала Архангела в Сітка. Входил в юрисдикцию Росийской Православной Церкви.

В маю 1970 р. стоял на челі делеґациі православных Американів, якы одобрали в Москві томос про автокафелию Православной Церкви в Америці. В тым же році спілорґанізувал канонізацию преподобноо Германа Алясканьского. Од 1972 р. служыл як владыка Піттсбурґа і Західньой Пенсильваніі. Был на посадах главы Выділу Реліґійной Освіты при Священным Синоді ПЦА і Комісиі до рыхтуваня 4. і 5. Всеамериканьскых Православных Соборів.

Предстоятель ПЦА

25. жолтня/октобра 1977 р. на 5. Всеамериканьскым Соборі в Монтреалі был выбраный за предстоятеля Православной Церкви в Америці. Признано му званя Блаженнійшого Архієпископа Ню-Йоркского, митрополиты цілой Америкы і Канады. В 1980 р. катедра предстоятеля была перенесена до Вашынґтону.

В 1990 р. был першым предстоятельом помістной православной Церкви, котрый одвиділ новообраного московского патріарху, Алексия ІІ. В рр. 1991 і 1993 гостил Алексия ІІ в Америці, в 1998 р. принял в очелюваній собом Церкви ґрузиньского патріарху Ілию ІІ, а в 2000 р. гостил митрополиту Польской Автокефальной Православной Церкви, Саву. Одбыл вельо подорожы і поломництв до другых помістных православных Церкви.

По двох інсультах, 2. квітня/апріля 2002 р. подал на Священный Синод ПЦА просьбу о звільніня го з обовязків предсоятеля Церкви. Його резиґнация была оголошена офіцияльно вчас 13. Всеамериканьского Собору в Орляндо.

Севериян КОСОВСКЫЙ, лем.фм, фот. www.oca.org, языкова управа: ред. АРК в СР.

(Публікуєме в оріґіналї – лемківскім варіантї русиньского языка.)