20. 10. 2020: В Польщы новы рестрикциі

Од суботы, 17. жолтня/октобра 2020, в цілій Польщы обовязуют новы рестрикциі. Подля новых інформаций червеном зоном обняты сут 152 повіты і міста на правах повіту.

В нижньошлезскым воєвідстві сут то м.ін. повіты: ґлоґівскій, ліґницкій, любіньскій ци польковицкій. В Малопольщы в червеній зоні находят ся м.ін. повіты: ґорлицкій, краківскій, лимановскій, новосандецкій ци новотарскій, а тіж Краків, Тарнів і Новый Санч. Вшыткы повіты, якы не были зачыслены до червеной зоны, автоматично остают в жолтій зоні. Подля розпоряджыня в жолтій зоні в высшых і понадосновных школах обовязує гыбридове вчыня; в червеній зоні на дистанс. В цілій державі обовязує заказ діяльности дискотек, клюбів і обєктів з місцьом до гуляня (окрем спортовых танцювальных клюбів і шкіл). Так само в цілій Польщы сут закрыты басены, водны паркы, центры фітнес і спорту. В обох зонах рестрикциями сут обняты і ґастрономічны локалі, якы можут быти одкрыты лем в годинах од 6.00 до 21.00. Занятый може быти лем што другій столик. Спортовы подіі мают проходити лем без участи публикы. Кєд іде о транспорт – лем половина місц до сіджыня або 30% вшыткых місц може быти занята. Публичны згромаджыня сут ограничены до 25 осіб в жолтій зоні і до 10 в червеній. В реліґійных подіях може брати участ не веце як єдна особа на 4 квадратны метры обєкту в жолтій зоні, і не веце як єдна особа на 7 в червеній зоні. Обовязує 1,5-метровый одступ медже вірныма, якы мусят закрывати ніс і ґамбу. Обовязуют і ограничыня гандлю – 5 осіб на касу в меншых склепах, або 1 особа на 15 квадратных метрів в великых. Од днес змінены сут і принципы тыкаючы орґанізациі імпрез, нп. весіля. В жолтій зоні може в них взяти участ максимяльно 20 осіб, без можливости гуляня. В червеній зоні обовязує заказ орґанізациі такых подій.

Ленка СТЕФАНОВСКА, лем.фм

(Публікуєме в оріґіналї – лемківскім варіантї русиньского языка.)