20. 1. 2022: Председа влады Войводины поздравив Русинів з їх святом

Міровіч хоче просаджовати політіку єдности і підпроы.

17-ый януар каждый рік святкує ся як День Русинів Сербії. Тот рік з нагоды празднованя нашого свята в Сербії заґратуловав Русинам і председа Покраїньской (автономной) влады Войводины Іґор Міровіч. Інформовав о тім портал Радіо-Телевізія Войводины.

За словами Міровіча, влада Войводиньской автономной области буде і далше підтримовати сохранїня языка, културы і звычаїв русиньской народностной меншыны. Міровіч повів, же богата културна дїдовизна і традіції русиньского народа суть частёв сполочных цїнностей, котры на тій теріторії плекають Сербы і Русины.

„Політіка єдности і підпоры є політіков, котру будеме просаджовати і в слїдуючім часї,“ пише ся в поздоровлїню председы войводиньской влады Іґора Міровіча.

Святкованя народного праздника в Сербії проходять од понедїлька 17-го януара 2022-го року, і закінчать ся в недїлю 23-го януара. Почас тыждня проходять многы події присвячены Дню Русинів Сербії в селах і містах, де жыє русиньске населїня.

В неділю одбудуть ся централны святкованя в Новім Садї, котрый тот рік може гордити ся тітулом Европске головне місто културы.

Проґрам почне в пізных пополудняйшых годинах в літурґіёв у Ґрекокатолицькій церькви св. апостолів Петра і Павла в Новім Садї, пак буде продовжовати выставов у фоає Сербского народного театру. Якраз новосадьскый театер буде і місцём, де о восьмій годинї вечур одбуде ся святочный ґалапроґрам.

День Русинів Сербії є встановленый на 17-тый януар із нагоды припоминаня собі дня, коли у 1751-ім роцї радник Марії Терезії і адміністратор Кралёвско-державного Бачского діштрікту в Зомборї Франц Йозеф де Редл підписав першый урядный документ – Контракт о насельованю 200 русиньскых ґрекокатолицькых родин зо Земпліна до втогдышнього Великого Керестура.

Тот день бере ся за день населёваня Русинів на тоты теріторії. Датум Дня Русинів Сербії прияла ся у 2007-ім роцї, і першый раз праздник святковали у 2008-ім роцї.

Петро МЕДВІДЬ, Лем.фм. Ґрафічна і языкова управа: ред. АРК в СР. Жрідло фотоґрафії: Покраїньска влада.