20. 1. 2020: Першый професіоналный герець і режісер меджі войводиньскыма Русинами

Драґен Колєсар (Драґутин Колєсар) нар. ся 29. 10. 1929 у Бачінцях у втогдышнїй Югославії, теперь на теріторії Сербії, умер 20. 1. 1995 у Петроварадінї у втогдышнїй Югославії, теперь на теріторії Сербії. Быв першым професіоналным герцём і режісером меджі войводиньскыма Русинами.

Д. Колєсар учів ся в театралній школї в Новім Садї (1949 – 1953), пізнїше вступив до Сербского народного театру і почас веце як двох десятьроч ту робив як герець і режісер (1953 – 1975). Почас своёй карьєры брав актівну участь в обчаньскім жывотї Русинів. Быв на челї драматічной секції в Руськім културнім обществі Максима Ґорького в Новім Садї (1953 – 1975), де выступав як герець і режісер інсценацій пєс в языку войводиньскых Русинів. Почас того періоду співав вєдно з Тамбуріньскым орхестром про радіо в Новім Садї, што приспіло к популарізації народных і естрадных співанок войводиньскых Русинів меджі остатнїма жытелями Югославії. Роблячі у Сербскім народнім театрї, інсценовав тыж 11 пєс про Руськый народный театер „Дядя‟ (1971 – 1985) і керовав русиньскы аматерьскы театралны колектівы в Коцурї, Вербасї і Петровцях (1974 – 1982). Охабивши професіоналну сцену, робив режісера русиноязычных проґрамів про телевізію в Новім Садї (1975 – 1983). Быв знамым і як інсценатор дакількох русиньскоязычных драм про радіо Нового Саду.

Павел Роберт МАҐОЧІЙ, здрой: „Енциклопедія історії та культури карпатських русинів‟ зоставителїв П. Р. Маґочія і І. Попа. Ужгород: „Видавництво В. Падяка‟, 2010, с. 344, переклад з україньского языка: А. З.