20. 1. 2020: Папа выменовав апостольского адміністратора кошыцькой єпархії

Папа римскый Франціск выменовав в понеділёк, 20-го януара 2020-го року, за апостольского адміністратора sede plena Кошыцькой ґрекокатолицькой єпархії владыку Кіріла Василя, тітуларного архієпіскопа Птолемаіды в Лібії, дотеперь архієпіскопа – секретаря Конґреґації про выходны церькви. Архієпіскоп Кіріл так дочасно поведе єпархію, котру од выникнутя у формі екзархату у 1997-ім роцї, пак од 2008-го року як єпарха веде владыка Мілан Хаутур.

 

Архієпіскоп Кіріл Василь

Новый апостольскый адміністратор sede plena Кіріл Василь народив ся 10-го апріля 1965-го року в Кошыцях. Ёго отець быв ґрекокатолицькым священиком. Богословскы штудії закінчів Кіріл Василь на Римокатольцкій кірілометодійскій богословскій факултї Універзіты Коменьского в Братіславі у 1987-ім роцї. В тім часї ґрекокатолицькы богословцї штудовали на римокатолицькій факултї, бо властну семінарію ґрекокатолици не могли мати.

По закінчіню штудій быв крижевацькым єпархом Славоміром Мікловшом рукоположеный на священика Пряшівской ґрекокатолицькой єпархії. Єпархія втогды не мала свого єпіскопа, вів єй ордінарій Йоан Гірка, пізнїшый єпарха.

В авґустї 1987-го року, з доволїнём ордінарія, еміґровав до Італії і зачав штудіюм на Правницькій факултїі Папского выходного інштітуту в Римі. В децембрї 1989-го року здобыв ліценціат канонічного права і зачав штудовати приправный рік ку докторату. В октобрї 1990-го року штудіюм перервав і наступив до новіціату Товариства Ісусового (єзуіты) у Дженові.

По навернутю до Рима у 1992-ім роцї продовжовав у штудію і в децембрї 1994-го року здобыв докторат канонічного права на Правницькій факултї Папского выходного інштітуту в Римі. У 2002-ім роцї быв на тій школї выбраный за декана, проректора і в маї 2007-го року быв выменованый за ректора.

Од мая 2009-го року є секретарьом Конґреґації про выходны церькви. Втогды быв і выменованый за архієпіскопа а єпіскопске рукоположіня прияв в юни од крижевацького єпіскопа Славоміра Мікловша і пряшівского архієпскопа і метрополіты Іоана Бабяка і кошыцького єпархы Мілана Хаутура. Є автором многых публікацій і довгы року сполупрацує з Radio Vaticana.

Адміністратор sede plena

Апостольскый адміністратор sede plena є выменованый за справцю єпархії в часї, коли єпархіальный єпіскоп не годен выконовати справу єпархії з важной, але з характеру дїла дочасной причіны, наприклад при хворотї. Офіціалны інформації не пишуть о тім, з якых причін не годен владыка Мілан выконовати свої права і обовязкы, но зіставать кошыцькым єпархом.

Петро МЕДВІДЬ, ЛЕМ.фм