2. 9. 2020: В Меджілабірцях обидві школы з навчанём русиньского языка

Од нового школьского року 2020/2021 прибыли на Словакії дві школы, котры мають офіціалный статус – основна школа з навчанём русиньского языка. Іде о Основну школу на Коменьского уліцї і Основну школу на Духновічовій уліці в Меджілабірцях.

Владимір Противняк, председа Містной орґанізації Русиньской оброды на Словеньску в Меджілабірцях (МО РОС) то про аґентуру TASR означів за історічный момент. Обидві основны школы, котры в містї суть, будуть такым способом мати русиньскый язык в рамках рядного навчалного процесу як предмет.

„Дотеперь ся на містных школах русиньскый язык учів лем у формі кружку, што ся од нового школьского року прінціпіално мінить,“ повів Противняк.

Як председа МО РОС в Меджілабірцях інформовав нашу редакцію, в Основній школї на Коменьского уліцї будуть мати од нового школьского року русиньскый язык першокласници і другокласници. На Основній школї на Духновічовій уліцї ся затля русиньскый язык будуть учіти лем в першій класї.

Покля є школа евідована як школа з навчанём русиньского языка, першокласници мають єдну годину предмету за тыждень. В другій класї ся дотація на предмет піднимать на дві годины тыжденно.

Подля Противняка є заведжіня русиньского языка до рядного навчалного процесу резултатом сполочной актівности самосправы – значіть міста, котре є зряджователём основных школ, директорів обидвох містьскых школ і МО РОС в Меджілабірцях.

Петро МЕДВІДЬ, ЛЕМ.фм, жрідло фотоґрафії: ОЗ Колысочка, языкова управа: ред. АРК в СР.