2. 6. 2020: Од 3. юна 2020 ся змінять правила главно про обходы,таксікы ці рештаврації

Од 3. юна 2020 буде мінімална площіна в обходах на єдного кліента намісто 15 м2 на 10 м2. Медії о тім інформовав премєр Іґор Матовіч (OĽaNO) в понедїлёк (1. 6. 2020) на пресовім бріфінґу по засїданю із конзіліумом одборників. У припадї таксіків ся тыж мінить правило мати фоліёв оддїлены заднї сідадла, буде то фунґовати на базї добровольности. Рушить ся і часове обмеджіня про фірмы верейного стравованя і так само ся мінить кількость лидей за столом вонка і внутрї.

„Надале в припадї рештаврацій і остатнїх фірем верейного стравованя і обчерствіня надале платить тота алтернатіва, же 10 м2 або одступ кліентів 2 метры взаёмно, як і оддаленость окраїв столїв 2 метры,‟ додав Матовіч на марґо зміны мінімалной площіны на кліента у внутрї обходів. Тоты собі можуть меджі алтернатівами і надале выберати.

„В припадї таксіків фолія переходить із позіції повинной до позіції рекомендованой. Кліматізація буде доволена і выжадованых 15 минут часового одступу меджі окремыма кліентами ся рушыть,‟ доповнив Матовіч з тым, же од таксікарїв ся і надале буде выжадовати дезінфекція простору по попереднїм кліентови.
„В припадї верейного стравованя ся рушить часове обмеджіня, котре было до 22.00 годины. Также то платить чісто, як собі то зреалізує село або місто, так то буде платне. Часове обмеджіня з погляду гіґіены не буде платне нияке,‟ додав Матовіч. В тім  контекстї премєр так само підтвердив зрушіня ліміту штодо кількости людей за столом. Як одповів премєр на новинарьскый вопрос, в недїлю обходыы зіставають надале заперты про санітарны потребы. На засїданю конзіліума діскутовав і о меджінароднім транспортї, як Матовіч авізовав, тот буде поволеный в моментї, кедь ся Словакія отворить в повній мірї (без обмеджіня 48 годин).

„На кінцю, кедь собі зрахуєме, встановиме, же много того запертого або обмедженого уж на Словакії не буде,‟ закінчів Матовіч. Вшыткы подробности має подля премєровых слов опубліковати Уряд верейного здравотництва СР почас днешнёго дня (2. 6. 2020).

Здрой: Медіалный сервіс Уряду влады СР, із словацького языка пертлумачів: А. З.

Script logo