2. 6. 2018: Одкрыли експозіцію Михала Стренка

Під замком в Старій Любовні в пятніцю 1-го юна 2018 дополідне святочно одкрыли Воєньску експозіцію Михала Стренка. Як словацьку державну пресову аґентуру TASR Браніслав Ільковіч, самопомічно єй выбудовала безпрофітова орґанізація Михала Стренка, котрой є Ільковіч директором.

Выставка, окрeм представлїня особы Михала Стренка понукать можливость перейти ся по єдинім вірно выбудованім закопі на Словакії в цїлковій довжці 100 метрів і відїти дакілько підземных бункрів. Навщівници експозіції можуть посмотрити собі і збранї, головно з періоду Другой світовой войны. Експозіція має подля Ільковіча велике значіня. Хоче вказати на крутость войны, але і дати честь ґероям ці припомянути родаків з реґіону котры вмерли в Другій світовій войні, і котры были у протифашістічнім одбої.

 

Михал Стренк

Стренк ся народив 10-го новембра 1919 р. в русиньскім селї Орябина, окрес Стара Любовня, і кідь мав шість років з родічами одышов до Споєных штатів Америкы. Закінчів середню школу в Пенсілванії, робив робітника при будованю драг і в октобрї 1939 р. ся приголосив до наморной піхоты (маріняци).

Барз скоро ся в боях освідчів і дістав шаржу сержанта. В роцї 1944 го як велителя оддїлу післали до боя о стратеґічный пункт – остров Іво Джіма. Америчане го заатаковали в повній силї, но высадити ся зо шыфы ся їм подарило аж во фебруарї 1945-го року. Під веджінём Стренка на выгаснутій сопцї Маунт Сурібачі підняли америцькый флаґ. Піднятя флаґу фотив фотоґраф аґентуры Associated Press Джов Росентал. За фотоґрафію пізнїше здобыв Пуліцерову премію. Фотоґрафія стала ся сімболом перемогы, хоць Стренк не дожыв ся ани дефінітівного покорїня острова. Тыждень по піднятю флаґу, 1-го марца 1945-го року, го засягнув шрапнел із америцькой шыфы почас того, як рисовав до піску план далшой акції. По войні было ёго тїло похоронене із честованями на Арлінґтоньскім народнім цінтерї, значіть, на місцї, де суть похоронены і америцькы презіденты.

П. М.

Script logo