2. 6. 2016: Духновічів Пряшів привітать веце як 70 участників

І того року одбуде ся цїлословацькый конкурз в декламації русиньской поезії, прозы, властной творчости, і малых сценічных форм під назвов Духновічів Пряшів 2016. Головным орґанізатором є Русиньска оброда на Словеньску і подія одбуде ся з фінанчнов підпоров Уряду влады Словацькой републікы – проґрам Култура народностных меншын. Духновічів Пряшів 2016 быв підпореный і Окресным урядом в Пряшові – одбором школства.

Духновічів Пряшів 2016 є вже 17-тым річником того конкурзу. З думков засновати тот конкурз пришла перед сімнадцятьома роками членка Русиньской оброды на Словеньску і їй бывша председнічка Анна Кузмякова. Того року ся буде на сценї Театру Александра Духновіча в Пряшові, де буде подія проходити, змагати веце як сімдесять участных – дїтей і дорослых. Катеґорії суть подїлены подля жанрів на поезію, прозу, властну творчость і малы сценічны формы. Окремо суть іщі тоты катеґорії подїлены подля віку декламаторів і творцїв.

Перед цїлословацькым конкурзом проходили реґіоналны і окресны конкурзы Духновічового Пряшова. На цїлословацькый конкурз поступають тоты найлїпшы із реґіоналных конкурзів. Тот рік лем в рамках окресного конкурзу в Свіднику брало участь пятьдесять декламаторів.

Цїлословацькый конкурз Духновічів Пряшів 2016 буде проходити 14-го юна 2016-го року од 9.00 год. в просторах Великой сцены Театру Александра Духновіча на ул. Ярковій 77 в Пряшові. Конкурз є одкрытым про шыроку публіку. Зато вшыткых любителїв русиньского літературного слова, русиньской поезії і прозы сердечно позываме, жебы пришли посмотрити і підпорити малых і дорослых декламаторів.

П. М.

 

Script logo