2. 2. 2017: В Мадярьску будуть святковати День памяти Годинкы

11-го фебруара 2017 р. в Мадярьску, в головнім містї Будапешть, Русины будуть праздновати День памяти Антонія Годинкы. Подію шторік орґанізує Цїлоштатна русиньска самосправа.

Проґрам святкованя зачінать о 12.00 год. панахідов коло гробу вызначного русиньского академіка, котрый походив із теріторії днешнёй Словакії – зо села Ладомирів. По панахідї буде проґрам продовжовати в Културнім домі в раёнї Зуґло ( Zugló Civil Ház) в Будапештї.

Як каждый рік, і теперь в рамках святкованя торжественно буде вручати ся Премія Антонія Годинкы. На святочнім проґрамі буде выступати і дуо Червена Ружа із Підкарпатя, котре творять Ольга Прокоп і Лілія Немеш. Якраз Ольга Прокоп має быти єдным із тогорічных лавреатів той споминаной нагороды. Премію бы того року мала дістати і редакція ґазеты Народны новинкы.

Народны новинкы были першов ґазетов Русинів у Чехословакії, пізніше на Словакії. Выходили од 21-го авґуста 1991-го року до децембра 2016-го року. Од року 2017 ґазета злучіла ся із ґазетов Інфо Русин, котра мала за собов 13 років выдаваня. Русины на Словакії тым чіном од року 2017 мають єдны злучены новинкы, котры выходжають під назвов НН інфо Русин – Народны новинкы Русинів Словакії. Цїлых 25 років выдаваня Народных новинок быв шефредактором ґазеты Александер Зозуляк. Тот од того року зістав уж лем шефредактором часопису Русин, котрого перше нулте чісло вышло іщі в роцї 1990.

Антоній Годинка быв вызначный славіста, історік, академік Мадярьской академії наук, ректор Печской універзіты і честный председа Підкарпатьского общества наук. Народив ся 7-го фебруара 1864 року в селї Ладомирів на Пряшівскій Руси. Умер 15-го юла 1946 року в Будапештї.

Script logo