2. 12. 2018: Людміла Шандалова одпрезентовала свою нову книжку

Як інформовало обчаньске здружіня tota agentura, 23.го новембра 2018-го року одбыло ся святочне уведжіня до жывота новой книжкы про дїти од Людмілы Шандаловой під назвов Ани бы сьте не вірили. (Позн. ред.: АРК в СР: на презентації были притомны і выступали там тыж одборны асістенты Інштітуту русиньского языка і културы Пряшівской універзіты в Пряшові ПгДр. Кветослава Копорова, ПгД., і Мґр. Міхал Павліч, ПгД.)

Нова Шандаловой книжка, котра вже традічно спід єй пера выходить в дзеркаловім русиньскім выданю – кіріліков і латиніков, вышла зн фінанчнов підпоров Фонду на підпору културы народностных меншын. Святочна презентація ся одбыла пообідї в Основній умелецькій школї у Свіднику.

 

Носителька літературных премій

Людміла Шандалова є писательков і културнов діятельков меджі Русинами Словакії, котра жыє у Свіднику. Дебутовала зборником стишків про дїти під назвов Подьте, дїти, што вам повім, котра вышла у 2013-ім роцї. В роцї 2015 за свій дебут была оцїнена Преміёв Александра Духновіча за русиньску літературу, котру удїлює Карпаторусиньскый научный центер в США.

У 2016-ім роцї выдала книжку повідань із часу Другой світовой войны під назвов Червеный берег. Ани тота книжка не обышла ся без оцїнїня, в роцї 2018 за ню Шандаловій Літературный фонд удїлив Цїну Александра Павовіча, яка ся удїлює раз за два рокы за творы написаны по русиньскы. Шандаловой книжка была выбрана як найлїпша по русиньскы написаный твір на Словакії, котрый выйшов у роках 2016 і 2017.

Окрем того, може  Шандаловой творчость знати і театрална публіка. Написала вже дакілько сценарів про дїтячі театралны пєсы, котры ся звыкнуть премєровати почас Русиньского фестівалу у Свіднику. Єдна з єй дітьскых пєс уж была наштудована і меджі войводиньскыма Русинами.

-пем-