2. 10. 2018: В Ладомировій зреконштруовали церьков

Деревяна Ґрекокатолицька церьков св. Михаіла Архістратига в селї Ладомирова, окрес Свідник, перешла великов реконштрукціёв, інформує словацька державна пресова аґентура TASR.

Церьков належыть меджі вісем деревяных храмів Карпатьского облука на Словакії, котры суть записаны до списку Світовой дїдовизны UNESCO. Роботы на реконштрукції зачали іщі минувшый рік вымінов шындлїв на пошкодженій стрісї.

 

Схосноване домашнє дерево

„Храм є вже практічно цїлый поправленый. Каждых пять років є треба мінити пошкоджены шындлї. Старали сьме ся, жебы были якостны і жебы дерево походило із того краю. Много раз хоснують ся шындлї, котры не суть з краю, з котрого є церьков, а потім вытримлють короткый час,“ повів ґрекокатолицькый парох у Ладомировій Осиф Гаврила. Як додав, даколи шындлї вырабляли ся ручно, днесь вже є то робота машын у фабрицї.

Подля слов пароха бы было потрібне іщі натерти деревяный плот коло церькви, котрый є в добрім ставі, но утримовати го треба. По часї ся може пошкодити, но покля ся натре, буде в порядку, пояснив про аґентуру Гаврила.

 

Храм із 18-го стороча з трёма дзвонами

Деревяна церьков у Ладомировій была збудована у 1742 роцї.

„Коло храму є збудована і велика дзвініця, в котрій суть три дзвоны. Найвекшый дзвін є названый по св. Михаілови Архістратигови і є з року 1742, другый середній дзвін є названый по св. Петрови, є із 1927-го року, і найменшый дзвін є з єднакого року і має мено св. Павла,“ інформовав містный парох.

Доповнив, же рарітов той церькви є деревяный іконостас, котрый быв збудованый в першій половинї 18-го стороча. Має пять шорів і належыть меджі найкрасшы на Словакії. Цїлкову реконштрукцію церькви підпорило Міністерство културы Словацькой републікы в рамках проґраму Обновме собі свій дім (Obnovme si svoj dom).

Петро МЕДВІДЬ, жрідло: лем.фм, жрідло фотоґрафії: ttstudio.sk