19. 7. 2019: Шанса на бінґо

В недїлю, 21-го юла 2019, будуть проходити на Українї вольбы до Верьховой рады. Із бадань, котры ся в остантім часї робили, выходить так, же партія нового презідента Володиміра Зеленьского Слуга народа будь з єдным коалічным партнером, або докінця і сама возьме власти до рук компелтно.

То буде про презідента добре в тім, же буде годен наповно просаджовати свої законы, свої реформы, свої погляды на то, де ся має Україна рушати, окрем того, же ся хоче рушати на Запад. Но буде то і конець алібізму. Вже ся не буде годен выгваряти, же ся штось не дасть. Буде то, покля рахуєме з тым, же партія му буде лоялна, лем в ёго властных руках. Дотеперь стигнув зробити про імідж державы важны навщівы, по вольбах може пустити ся до важной роботы.

Покля выходиме з того, же він сам быв протестом проти дотеперішнїх естаблішментів на Українї, пак лоґічно очекуєме, же ся із них поучів і зачне робити політіку іншак. Же зачне головно робити політіку таку, жебы го люди ганебным дебаклом не гнали з уряду по закінчіню мандату так, як погнали своїм голосованём у презідентьскых вольбах Петра Порошенка.

Нас самособов інтересує передовшыткым єден вопрос, а то як буде односити ся ку дїлам Русинів. Конкретнїше, ці вырїшыть проблем, котрый ся з Українов тягне од їй выникнутя у 1991-ім роцї і узнать Зеленьского Київ конечно єден із своїх корінных народів за повноправну народностну меншыну.

Шансу, же ся теперь може штось подарити на благо Русинів мож відїти главно з двох причін. По перше, Володимір Зеленьскый ся, в порівнаню, наприклад, із Петром Порошенком, явить як автономнїшый політік, котрый хоче рїшыти дїла по новому. Не одходить із драгы інтеґрації на Запад, но проявлює ся як самобытнїшый артістом, і то теперь не думам на ёго попередню професію, але на політінчій сценї. Сам хоче рїшыти проблем із Росіёв, рїшіня проблему видить, якбач, іншак як лем стрілянём, докінця проявив інтерес о стрїчу з Путіном, хоць затля неуспішно. На другім боцї то не є чоловік, котрый спустив перед Кремлём голову ку землї. На московску політіку роздаваня обчанства одповів єднако. І кедь сьме коло той інтеґрації, там собі, ці скорїше або пізнїше, буде мусити усвідомоти, і кебы не хотїв, же путь веде на Запад лем через дотримованя штандардів, котры ся дотулятють і людьскых ці народностных прав.

По друге, іщі все є можность, кедьже баданя можуть много раз быти дакус далше од реалных резултатів выборів, як бы сьме чекали, же Зеленьскый буде потребовати коалічного партнера. З бадань днесь выходить, же окрем презідентовой партії ся має шансу дістати до парламенту іщі Опозічна платформа – За жывот, Евпроска солідарность бывшого презідента, партія Юлії Тимошенко Отцюзнина і Голос Святослава Вакарчука. Гей, політічны рїшіня суть даколи великым несподіванём. Але было бы барз чудне, кебы ся Зеленьскый по вольбах хотїв доїднати на коаліції з Порошенком, проти котрого боёвав, або з Тимошенковов, котра є в політіцї скорїше уж лем споминов на Паріж перед тридцятёма роками.

І так нам выходять дві партії – Опозічна платформа і Голос. Комбінація Вакарчука зо Зеленьскым є днесь наконець єднако одкрыта (бо така є на кінцю дня політіка), як і комбінація Зеленьскый – За жывот (хоць є проросійска). Омного веце ся друга можность одкрыє, кедь буде мати платформа вызначно веце процент як Голос. Но і то є далша причіна того, жебы сьме у русиньскім вопросї могли чекати позітівну зміну. Опозічна платформа предці уж перед презідентьскыма вольбами одкрывала тему узнаня Русинів, сімболы той партії было недавно відїти на сценї Дня Русина. Покля бы ся дістала до коаліції з партіёв презідента, може прямо в коалічнім договорї жадати, жебы з вопросом Русинів рушало ся, і жебы быв конечно вырїшеный.

Самособов, карты роздають голосуючі аж в неділю. Аж пак буде мож реално раховати можности, нелем коалічны, але і тоты нашы. Шанса ту про Русинів є. Но єднако є шанса і выграти міліонове бінґо. В припадї Україны ся бою того, же реалнїше буде выграти бінґо, як вырїшыти наш вопрос. Так то дотеперь было все. Бодай бы єм теперь не мав правду.

Летро МЕДВІДЬ, ЛЕМ.фм, статя была написана як коментарь „Вступне до контроли“ лемківского радія lem.fm.