19. 7. 2017: Засїдав меншыновый выбор у новім складї
У віторок, 18-го юлія 2017-го року в просторах Пресцентра Уряду влады Словацькой републікы в Братїславі проходило выняткове засїданя Выбору про народностны меншыны і етнічны ґрупы у ёго новім складї. Народностны орґанізації за окремы державов узнаны народностны меншыны собі на трирічный період выберали своїх представителїв 3-го юлія, україньска меншына своїх членів выбрала в доповнюючіх вольбах 12-го юлія.
Членове выбору собі на засїданю перевзяли декреты о своїм членстві у выборї з правом голосовати і занимали ся далшыма двома основныма пунктами. Вольбов підпредседы выбору і вольбов єдного члена дозорной комісії нововыникнутого Фонду на підпору културы народностных меншын, котрый має од року 2018 перевзяти аґенду фінанцованя меншыновой културы як верейноправна інштітуція. Дотеперь фінанцованя было під ґесціов Уряду влады Словацькой републікы в рамках проґраму Култура народностных меншын.
Представителї Русинів у выборї – Петро Медвідь і Мілан Ян Піліп, на обидві функції пропоновали своїх номінантів. За підпредседу выбору, котрый ся выберать із членів, быв Русинами номінованый Мілан Ян Піліп, котрого номіновала і мадярьска народностна меншына. Далше на тоту функцію кандідовала Даґмар Такачова за чеську народностну меншыну і Павел Траубнер, котрый быв номінантом жыдівской меншыны з підпоров моравской меншыны. У двойколовых вольбах была за підпредседнічку выбору выбрата Даґмар Такачова, яка у функції вычеряла Павла Траубнера. Тот быв підпредседом два функчны періоды – од заснованя Выбору про народностны меншыны і етнічны ґрупы у 2011-ім роцї. Підпредеда выбору є подля штатуту автоматічно і членом Рады влады Словацькой републікы про людьскы права, народностны меншыны і родову рівность.
За члена дозорной комісії у фондї быв русиньскыма представителями номінованый правник Любомір Кубічка. Далшыма кандідатами были Клавдія Секереш – номінантка мадярьской меншыны, котра є і членков выбору за тоту меншыну, Томаш Тілняк, котрого номіновала україньска меншына і Іґор Турук, котрый быв кандідатом Ромів. І в тім припадї проходили двоколовы вольбы, на кінцю котрой быв за члена дозорной комісії нового Фонду на підпору културы народностных меншын выбратый Іґор Турук.
Членове выбору на своїм засїданю занимали ся і вопросом алармуючого ставу повязаного з пізнїнём выплачаня грошей на схвалены проєкты на тот рік в рамках проґраму Култура народностных меншын 2017. Дотеперь векшына орґанізацій на свої проєкты не дістала фінанції і жадателї мусять робити свої проєкты на довг або пересувати реалізацію проєктів на пізнїшы датумы. Председа выбору, котрым є уповномоченый про народностны меншыны і етнічны ґрупы, Ласло Буковскый, на засїданя закликав вшыткы директоркы окремых одборів, котры ся до той справы односять, жебы пояснили причіны сітуації. Єдночасно были представителї меншын убезпечены, же робітници односных урядів будуть робити вшытко, жебы грошы про жадателїв были выплачены до кінця авґуста.
Ласло Буковскый далше членів выбору інформовав, же на слїдуюче засїданя, котре є наплановане на половину септембра 2017-го року, буде запрошеный брати участь і нововыменованый директор Фонду про підпору културы народностных меншын – Норберт Молнар. Членове з ним будуть годны діскутовати о проблемах дотеперїшнёго фінанцованя меншын з цїлём, жебы в новій сістемі фінанцованя, котра буде функціоновати од слідуючого рока, передышло ся тым проблемам, котры меншыны мали коло роблїня своїх проєктів і выплачаня грошей на тоты проєкты дотеперь.
П. М.
