19. 6. 2024: Фундація ПСК помагать по зливах в селах Вубля і Михайлов

Як у віторок, 18-го юна 2024-го року, інформовало Оддїлїня комунікації Пряшівского самосправного краю (ПСК), до гуманітарной помочі про родины, котры постигли недавны зливы в окресї Снина, залучать ся і пряшівска крайска самосправа.

Поміч іде конкретно до русиньскых сел Вубля і Михайлов, де промптно поможе ся штирём жадателям. Роздїлило ся про них майже 6 тісяч евр, і то посередництвом крізового фонду фундації ПСК.

Минулотыжднёвый додж в окресї Снина залляв веце домів, так само студнї, запхав каналізацію і підписав ся так само на многых місцях під зосуваня землї. Шкоды на маєтку рахують і родины із сел Вубля і Михайлоов. Зато край вырїшыв помочі їм урґентно.

Скликана была Справна рада Фундації ПСК про підпору родины, і посередництвом фонду про рїшіня крізовых сітуацій, в котрім суть обидві села приголошены і давають до нёго каждый рік встановлену суму, роздїлило ся меджі найвеце постигнуты родины 5 900 евр.

Фінанчна поміч іде про три родины із села Вубля, і єдного жадателя із села Михайлов.

Як далше інформовав ПСК, Справна рада Фундації ПСК про підпору родины засїдала в актуалнім волебнім періодї уж по 11-ый раз, в тім роцї уж 5-ый раз. Лем тот рік перероздїлила фундація меджі жадателїв уж майже 230 тісяч евр.

Петро МЕДВІДЬ, ЛЕМ.фм, языкова і ґрафічна управа: АРК в СР.