19. 6. 2021: Премєр Геґер оддав почливость блаженым єпіскопам

Председа влады Словацькой републікы Едуар Геґер (на фотцї) быв у пятніцю, 18-го юна 2021-го року, на робочій навщіві Пряшова. Премєр одкрывав зреконштруовану Яркову уліцю, на котрій окрeм іншого є і Велика сцена Театру Александра Духновіча.

В рамках свого робочого дня словацькый премєр в метрополі Шаріша быв приятый і в резіденції Ґрекокатолицького архієпіскопского уряду архієпіскопом метрополітом Йоаном Бабяком (на фотцї). Інформовав о тім Інформачный центер Пряшівской архієпархії.

Почас короткой навщівы собі председа влады в супроводї владыкы Йоана посмотрив просторы архієпіскопской резіденції.

„З увагов выслухав собі лекцію о історії ґрекокатоликів на Словакії і оддав почливость особностям той церькви – блаженому єпіскопови мученикови Павлови Петрови Ґойдічови, оцїненому тітулом Яд Вашем – Справедливый меджі народами, і блаженому єпіскопови мученикови Василёви Гопкови,“ інформовав Михал Павлишіновіч, говорця Пряшівской архієпархії.

„Премєр Едуард Геґер пак зістав з архієпіскопом в щірім розговорї, почас котрого обговорили різны актуалны общественны темы. Владыка Йоан упевнив премєра о ёго молитвах за представителїв державных властей і на кінцю му удїлив своє архієрейске благословлїня,“ закінчів інформацію Павлишіновіч.