19. 6. 2021: Вмерла Сенка Бенчік, русиньска учітелька і авторка выдань з русиністікы

Як інформовав портал Радио-Телевизия Войводини, по коротшій і тяжкій хвороті в пятніцю 18-го юна 2021-го року вмерла учітелька русиньского языка і авторка выдань з русиністікы Сенка Бенчік із Нового Орахова в Сербії.

Біоґрафію Сенкы Бенчік про нашу редакцію додала Іріна Папуґа.

Сенка Бенчік, за слободна Папуґа, народила ся 28-го децембра 1973-го року в Бачка Тополї, де закінчіла і основну школу. Середнёшкольску освіту педаґоґічного напряму закінчіла у школї Петро Кузмяк в Руськім Керестурї. Пак штудовала на Педаґоґічній академії в Суботіцї і на Педаґоґічній факултї в Зомборї.

Дві роботы з тітулом master (рр. 2012 і 2017) обгаїла на Філозофічній факултї на універзітї в Новім Садї.         

Учіти русиньскый язык як волительный предмет з елементами народной културы новоораховскых школярів, з підтримовков Дружства про русиньскый язый, літературу і културу, зачала іщі як штудент-абсолвент Педаґоґічной академії на основных школах Чакі Лайош в Бачка Тополї і 18. октобер в Новім Орахові. Школярї все із свойов учітельков были участны на стрічах русиньскых школ і так само три юбілейны стрічі орґанізовали.

Сенка Бенчік была реґуларным участником семінарів із русиньского языка а членом Актіву учітелїв русиньского языка. Орґанізовала Семінар о стиху як літературнім жанрїі в русиньскім языку в Новім Орахові у 2006-ім роцї. Так само брала участь на орґанізації штирёх Округлых столів з минулости Русинів і Новім Орахові.

Резултатом тых стрїч было выданя двох книжок о Русинах у Новім Орахові, котры выдало Дружство про русиньскый язык, літературу і културу.

Сенка Бенчік так само была редакторков і модераторков русиньскых проґрамів в Радіо Реґія општин Бачка Тополя і Малый Ідош.

Была предсидательков Секції Дружства про русиньскый язык, літературу і културу в Новім Орахові, в рамкак котрой была основана Літературна секція Штефан Чакан. Актівнов была Сенка Бенчік в Културно-умелецькім домі Петро Кузмяк в Новім Орахові.

Почас свого жывота здобыла плакету проф. Гаврила Г. Надя у 2006-ім році, а так само нагороду Општины Бачка Тополя в році 2020.

Сенка Бенчік была і у функції директоркы Основой школы 18. октобер, так само і в Новім Орахові, де ся учіть по мадярьскы. Навчаня по мадярьскы, навчаня русиньского языка в мішанім оточіню, кторый є в Новім Орахові, де жыюти Сербы, Мадяре і Русины, іншпіровало Сенку Бенчік, жебы з великым заінтересованём і дяков зачала выглядавати мадярізмы в русиньскім языку і жебы на Філозофічній факултї в Новім Садїі обгаїла дві роботы з тітулом master під назвами: Гунґазірмы у русиньскім языку і Сполочны гунґарізмы в сербскім і русиньскім языку.

Была авторков двох книжок: Гунґаризми у руским язику з року 2014 і Лексични паралелизми з року 2020, котры выдало Дружство про русиньскый язык, літературу і културу.

Вічная память!

Петро МЕДВІДЬ, ЛЕМ.фм, ґрафічна і языкова управа: ред. АРК в СР.