19. 6. 2018: В Ужгородї хотять уліцю Фединишинця. Екстремісты протестують

Днесь,19-го юна 2019-го року, будуть проходити в Ужгородьскій містьскій радї публічны діскусії о переменованю дакотрых уліць і о назвах новых уліць. Меджі пропонованыма змінами є і пропозіція переменовати Уліцю Антона Кашшая на Уліцю Володиміра Фединишинця.

Ужгород бы такым чіном дістав уліцю з меном єдного із найвызначнішых русиньскых актівістів і писателів по 1989-ім роцї. Націоналісты і екстремісты зо Свободы і Карпатьской січі протестують.

 

Володимір Фединишинець

Русиньскый писатель і діятель Володимір Фединичинець народив ся в селї Репинне 9-го мая 1943-го року. Быв то педаґоґ, писатель, журналіста, публіціста, теоретік літературы.

Фединишинця мож брати як чоловіка, котрый на кінцю совєтьского періоду зачав русиньскый рух на Підкарпатю. Належав меджі основателїв орґанізації „Общество подкарпатських русинов‟, котре стало пізнїше сполуосновательсков орґанізації Світового конґресу Русинів. Хотїв, жебы русиньскый язык быв кодіфікованый, о чім написав і дакілько есеїв, дакотры з них были публікованы у триязычній русиньско-словацько-анґліцькій публікації Мирна наша русинська путь із 1992-го року, але і в далшых публікаціях. Быв автором многых книг і есеїв. По 1989-ім роцї зачав писати по русиньскы. Як чітаме в завершалнім слові ку збірцї Мы – слызынка на земли, выданій у 1999-ім роцї, по русиньскы думав одколи ся народив, но писати по русиньскы зачав пізнїше.

Володимір Фединишинець є і автором крылатого выслову Мы Русины – Неба сыны і далшых. У 2004-ім роцї став лавреатом Премії Александра Духновіча за русиньску літературу в рамках котрой передавать ся мала скулптура карпатьского медвідя. Быв і лавретом Премії Александра Духновіча за вызначне дїло проРусинів, котре удїлює Научно-бадателькый цетер у США. Вмер 3-го октобра 2018-го року.

 

Екстремісты протестують

Проти задуму переменовати в Ужгородї Уліцю Антона Кашшая, котра бы по новому мала мати мено Володиміра Фединишинця, ся вже озвали націоналісты і екстремісты. Як перша зачала протестовати націоналістічна політічна партія Свобода, конкретно їй закарпатьска областна орґанізація.

„Высловлюєме свій катеґорічный протест проти того, жебы в Ужгородї обявила ся уліця єдного із іншпіраторів сепаратістічного руху на Закарпатю, котрый быв меджі основателями антіукраїньского Общества подкарпатських русинів Володиміра Фединишинця, якый робив редактора українофобной ґазеты Подкарпатська Русь,“ пише ся у выголошіню Свободы.

Націоналісты далше обвинюють Фединишинця зо сепаратізму, говорять же є аморалным уж лем тото, же о такім чімсь як названя уліцї ёго меном іде ся діскутовати.

Тихо не зістала ани Карпатьска січ. „Як сьме ся дізнали, в Ужгородї планують назвати єдну уліцю на чесь русиньского сепаратісты Володиміра Фединишинця,“ пише екстремістічна Карпатьска січ під веджінём Тараса Деяка. Знова повторяють то, же Фединичинець основав русиньску орґанізацію і прикладають, же Фединишинець „зъєдиненя Закарпатя з Українов“ называв окупаціёв.

Карпатьска січ кличе людей днесь до Ужгородькой містьской рады. Хотять „сохранити Ужгород од далшой сепаратістічной ганьбы.“

Петро МЕДВІДЬ, ЛЕМ.фм