19. 5. 2020: Руске слово має 75 років. Святкованя суть пересунуты

Найстарше із існуючіх русиньскых выдавательств, котре в сучасности діє, Руске слово тот рік святкує 75 років од свого заснованя. Хоць святкованя мали проходити в місяцях май і юн, напланованы святочны події будуть пересунуты на пізнїшый термін, котрый іщі не быв становленый.

Пересунутя святковань є запричінене сітуаціёв коло пандемії нового тіпу коронавірусу і з тым повязаныма рештрікціями. Інформовав о тім сайт аґентуры Рутенпрес, котра є так само під Новинарьско-выдавницков інштітуціёв Руске слово. Найскорїшы можны терміны перенесеных святковань суть ку кінцю літа або початком осени.

Новинарьско-выдавницка інштітуція Руске слово при нагодї своёй річніцї хоче зорґанізовати конференцію о молодых, одборно-научну громаду часопису Шветлосц, котрого є выдавателём і святочне передаваня оцїнїнь робітникам і сполупрацовникам того выдавательства.

 

НВУ Руске Слово

Новинско-видавательна установа Руске слово, як звучіть оріґінална назва выдавательства в языку войводиньскых Русинів, є найстаршым єствуючім русиньскым выдавательством періодічной і неперіодічной пресы, котре почало своє діяльство у 1945-ім роцї як Друкраня Рускей матки в Руськім Керестурї, втогдышня Югославія, днесь Сербія.

Выдавательство мінило свою назву, наперед то была Друкарня народного фронта Руски Керестур, пак Подник друкарїв і выдавателїв Братство-Єдинство ці пізнїше Выдавательско-друкарьскый подник Руске слово. У 1968-ім роцї выдавательска часть фірмы оддїлила ся од друкарнї в Руськім Керестурї і перенесла ся до Нового Саду, де є доднесь.

Почас своёй історії выдавательство Руске слово выдало стовкы книжок прозы і поєзії войводиньскых русиньскых авторів, різны етноґрафічны і лінґвістічны штудії, антолоґії, словникы ці переклады іншоязычных авторів до русиньского языка.

В рамках періодічной пресы выдавать тыжднёву ґазету Руске слово, літературно-умелецькый журнал Шветлосц, журнал про дїти Заградка, молодежный журнал Мак, і шторічник Народни календар, пізнїше Руски календар. Під выдавательство належыть і аґентура Рутенпрес.

Спомеджі дотеперїшнїх директорів выдавательства мож спомянути такы мена, як Дюра Варґа, Дюра Латяк, Любомір Рамач, Гелена Медєші ці Наталія Дудаш. Сучасным шефом выдавательства є Борис Варґа.

Петро МЕДВІДЬ, ЛЕМ.фм