19. 4. 2019: Хрестна дорога в ґрекокатолицькій парохії Пчолине

12. апріля 2019 в ґрекокатолицькій парохії Пчолине одбыла ся хрестна дорога. На тій дорозї взяли участь віруючі і священици з парохій Снина, Гостовіцї, філіалка Чукалївцї, яку вів пчолиньскый отець духовный Мартін Костілник, котрый має велике і оддане серце про великы річі.

На хрестній дорозї взяли участь і отець декан Марош Прейса, о. Алексей Яночко з гостовицькым священиком Михалом Ґалмусом. Наслїдно тот хрест на пчолиньскім верьху быв намонтованый і высвяченый. Тота хрестна дорога была споєна з вынесінём желїзного візантійского хреста, котрый быв вытвореный молодым пчолиньскім хлопом Міланом Михалом Ґніпом. Тот  чоловік має 21 років і теперь кінчіть бакаларьскый ступень на Технічній універзітї в Кошіцях із деташованым робочім місцём у Пряшові. Як він говорить, вытворити хрест было проявом ёго покоры і усвідомлїня собі, же Ісус умер за каждого з нас, значіть, і за нёго. Дале підкреслив: „при выробі хреста єм собі усвідомив єдну важну річ, не є жадной дорогы к Богу лем через приятя властного хреста і наслїдным наслїдованём Хріста. Треба мати покірне і тихе сердце. Одпущати, цїнити собі своїх родічів і близкых.‟

 

Інтересности візантійского хреста

Меджі найцїннїшы археолоґічны найджіня на теріторії бывшой Великой Моравы є безспорно візантійскый хрест-капторґа, найденый у западній Словеньскій Мачі. На хрестї суть зображены три поставы, але укрижована є лем єдна. Ісуссова подвойна природность (божска і людьска) є майстровскы зображена в подобі двох Божскых особ, котры але не суть укрижованы. Іде о найважнїшу тайность і доґму нашой віры. Богочоловічество Ісуса Хріста укрижованого на хрестї і єдночасно факт, же дійсный Бог не є єдиный, але єдночасно Тройєдиный а же Ісус Хрістос не перестав быти Богом і особов Пресвятой Тройцї на хрестї.

Укрижованый Хрістос є ту зображеный в кралёвскім облечіню, а не з тернёвым вінцём на голові, але з кралёвсков корунов, з отвореныма очами, як вітяз, котрый переміг смерть. Зображовати Ісуса Хрісрта на хрестї облеченого, быв обычай найстаршых хрістіаньскых сторіч. Увагу собі заслуговує самостатна кралёвска коруна, а то нияк не нагодно, не є прямо на голові укрижованого Хріста, але надносить ся над ёго головов, бо є сполочнов корунов цїлой нероздїлной Пресвятой Тройцї, т. є. Отця, Сина і Святого Духа. В Ісусовій правій руцї ся находить-вісить кралёвске жезло, т. є. Стародавный сімбол кралёвской моци. Укрижованый є значіть Краль. По ёго лївій руцї є зась палмовый молодник – стародавный сімбол Славы. Комплетный старославяньскый надпис на карторзї-хрестї є: ІСУС ХРІСТОС ЦАР СЛАВЫ. Є то тіпічне старославяньске названя, котре ся находить на векшынї найстаршых Славянамами выображінь укрижованого Хріста.

Маріяанна ҐНІПОВА