19. 3. 2021: Про бідных Мукачівской єпархії вызберало ся понад 45 тісяч евр

Минувшый рік Місійне общество святого Вікентія де Пол на Словакії зорґанізовало збірку на поміч найбіднїшым в Мукачівскій ґрекокатолицькій єпархії. На тот замір быв зрядженый банковый рахунок, котрый дістав назву Фонд владыкы Мілана.

Фонд названый по мукачівскім єпархови Міланови Шашікови, котрый в минулім роцї наглі вмер, зорґанізовало ёго властне общество, кедьже сам быв вікентіяном.

Вже штири місяцї по смерти мукачівского владыкы, котрый великыма буквами записав ся до історії і розвитку єпархії, в новембрї 2020-го року, владыка Ніл Лущак, апостольскый адміністратор Мукачівской єпархії, прияв дар в сумі 40 тісяч евр од орґанізаторів фонду у єпіскопскій резіденції в Ужгородї.

Зачатком марца того року апостольскый адміністратор перевзяв другу часть той збіркы в сумі 5 241,88 евр. Як інформовала Пресова канцеларія Конференції єпіскопів Словакії (TK KBS), вдяка щірости многых дарцїв із Словакії ся так подарило вызберати 45 241,88 евр.

Владыка Ніл з той нагоды загнав і коротке відео, в котрім дякує за тоту фінанчну поміч. Підкреслив, же і кедь владыка Мілан Мукачівску єпархію опустив, далше стоїть при нїй і помагать їй.

Як припомянув повінціал вікентіянів на Словакії, Томаш Брезані, збірка была оголошена до кінця календарьного року 2020.

„Покля бы хтось хотїв і в будучности підтримати тото дїло, ці уж своїм даром, або літурґічнов штіпендієв, радо таку поміч зреалізуєме. Банковый рахунок створеный на тот замір і надалше зохабить собі назву Фонд владыкы Мілана. То скромный, але конкретный і так потрібный дар про Мукачівску єпархію,“ цітує ТK KBS провінціала.

Грошы вызбераны у Фондї владыкы Мілана ідуть про найбіднїшых і про священиків Мукачівской ґрекокатолицькой єпархії, котры так само мають складну фінанчну сітуацію. Інформації о можливости пожертвовати грошы до фонду найдете на сайті словацькых вікентіанів.

Петро МЕДВІДЬ, ЛЕМ.фн, языкова управа а звыразнїня писма: ред. АРК в СР, жрідло фотоґрафії: vincentini.sk

Script logo