19. 3. 2020: О коронавірусї треба інформовати і в меншыновых языках

Односно актуалной сітуації з пошырёванём коронавірусу в Европі в середу, 18-го марца 2020-го року, выдав своє выголошіня і уповномоченый влады Словацькой републікы про народностны меншыны Ласло Буковскый.

Подля слов уповномоченого Словакія мусить попасовати ся в повязаню з ховоротов COVID-19 з найвекшов безпечностнов грозьбов за остатнї десятьлїтя. Словацька влада вже 16-го марца выголосила стан нужды і прияла далшы крокы, жебы забранити пошырёваню коронавірусу в Словацькій републіцїі. То подля уповномоченого выжадує конкретны наряджіня і цїлодержавну інформачну кампань з боку одповідных.

 

Зробили ся переклады

Уповномоченый зато минувшый тыждень забезпечів переклад основных інформацій о коронавірусї до мадярьского, ромского, русиньского, україньского і нїмецького языка. То языкы меншын, котрых членове мають холем в єднім селї 20 процент свого населїня, жебы годны были хосновати свій материньскый язык в уряднім контактї.

У сполупраці з Урядом верейного здравотницьтва Словацькой републікы были тоты інформації публікованы на вебсайтах односных реґіоналных урядів верейного здравотницьтва, припадно загнаны рівно на села з ромскым, русиньскым, україньскым і нїмецькым населінём.

 

Уповномоченый апелує інформовати в языках меншын

11-го марца 2020-го року подля свого выголошіня уповномоченый пожадав председкыню Централного крізового штабу Словацькой републікы Денісу Сакову, котра є єдночасно міністерков внутрїшнїх дїл, жебы ся при інформованю людей в повязаню з грозьбов коронавірусу не забывало на односны установлїня меншынового языкового закона.

Подля того закона інформації, написы і оголошіня, котры дотуляють ся огрожіня жывота, здравя, безпечности або маєтку обчанів подавають ся людём і в меншыновых языках.

„Зато вызывам орґаны верейной справы (містну державну справу, села і міста), нима зряджены правны особы (школы, културны, здравотницькы і соціалны заряджіня, ітд.), правны особы (соціалну поістёвню, здравотны поістёвнї, здравотны заряджіня, шпыталї, обходны рітейлы – наприклад Tesco, Billa, Jednota, Kaufland, Lidl, Желізніці Словацькой републікы, Словацька пошта, ітд.) і фізічны особы – подникателїв, жебы в смыслї споминаного дотримали закон і вшыткы інформації, написы і оголошіня в повязаню зо сучаснов надзвычайнов сітуаціёв публіковали в меншыновых селах і в меншыновых языках,“ апелує у своїм выголошіню Буковскый.

Уповномоченый припомянув, же недотирманя того обовязку є деліктом і вшыткым обовязаным субєктам може быти даный штроф од 50 аж до 2500 евр. Буковскый вірить, же дотриманём того обовязку і ефектівнїшов формов інформованя людей ся поможе ку безпечности і охранї жывотів обчанів.

Петро МЕДВІДЬ, ЛЕМ.фм