19. 2. 2021: Гелена ҐІЦОВА-МІЦОВЧІНОВА:  (Стихы)

Гелена Ґіцова-Міцовчінова

Зведаве у селї
і мале створїня,
із якого оно
походить корїня.

Маш нянька Русина,
дїда і прадїда,
та і ты Русинка
з красного Бескіда.

А братик Іванко
вызнать ся в азбуцї,
бо в нёго русиньскый
букварик у руцї.

***

Знаш лем Ты,
Отче всемогучій,
што пишу
родным словом
на чістім
біленькім 
листочку.

Подай здравя,
щастя, покій
про каждого 
нянька
і кажду 
мамочку.

Хрань нашу
русиньску
родину
в благодати,
од грїху
і гнїву,
прошу Тебе,
Сыне Божый,
і Пречісту Діву.

***
В школї дїти
з букваря
материньскы
златы слова
прочітають,
а за столом
дома гостїв
привітають.

Не потїшыть,
што од чуджых
є узяте,
то не шумне,
то не красне,
марузате.

А з пинкайлом
пиштек, дїти,
на листочку
укладайте 
златы слова
у рядочку,
бо вы знате, 
што белаве
а што руде,
най сыночок
в чуджім світї
не поблудить,
але про наш 
род русиньскый
шумны слова
прочітають
в світї люде.

(З приправлёваной книжкы Гелена Ґіцёвой-Міцовчіновой – Поклад русиньской матери.)