19. 12. 2020: Вышла інтересна книжка в чеськiм языку – Po stopách Rusínů v Evropě

В тых днях дістала ся нам до рук моноґрафія „Po stopách Rusínů v Evropě: Ukrajina, Slovensko, Srbsko, Polsko a Maďarsko“ (Praha: Nostalgie, 2020, 278 s., ISBN 978-80-906207-8-0) авторів: Петр Кокаісл, Андреа Штолфова, Павла Файфырлікова, Вероніка Нємцова, Яна Зіхова, Ірена Цейпова і колектів. Рецензентами публікації суть: член Канадьской кралёвской академії і професор Торонтьской універзіты Павел Роберт Маґочій і директорка Центра языків і култур народностных меншын Пряшівской універзіты в Пряшові доц. ПгДр. Анна Плїшкова, ПгД.

Нова моноґрафія сі кладе за цїль приближыти сучасну сітуацію Русинів у встановлёваных  европскых штатах, де є їх кількость подля офіціалных або одгадованых штатістік найвекша – на Українї, Словакії, в Польщі, Мадярьску і Сербії. При мапованю сітуації русиньского жытельства в тых країнах было снажіня увести кількости русиньского жытельства у баданых країнах і єдночасно вказати на проблематічность здобываня точных даней одностно Русинів. Далшым цїлём баданя было встановити, якы главны елементы творять русиньску етнічну ідентічность – ту без огляду на ґеоґрафічны одлишности на першім місцї выступовали набоженьска принадлежность, респектівно візантійскый обряд (ґрекокатолицькый або православный). Баданя так істо ся заміряло на поужываня русиньского языка і зміны ёго статусу, можности навчаня русиньского языка і інтерес о тото навчаня збоку самых Русинів. Окрем тых двох главных аспектів русиньской ідентічности, были встановлёваны і далшы важны елементы русиньской матеріалной і нематеріалной културы.

„Выслїдкы в тій публікації суть із теренного баданя і баданя з русиньскыма респондентами, роблене посередництвом електронічной комунікації в роках 2014 – 2019‟, увів главный автор публікації Петр Кокаісл у передслові книжкы.

-аз-

Script logo